O‘zAda Farg‘onada bir oshxonaning ikki kishiga sotilgani haqida maqola e‘lon qilindi. Quyida ushbu maqola to‘liqligicha e’tiboringizga havola etiladi.
Bir oshxona ikki kishiga sotildi. Qanday qilib deysizmi? Firibgarlik yo‘li bilan albatta. Tadbirkorlarga berilayotgan imkoniyat, shart-sharoitlar va ishonchni suiiste’mol qilib, firibgarlik orqali nafaqat sodda insonlarni, balki davlatni ham aldashga urinayotganlar bor.
Farg‘onalik aka-uka Rahim va Rasul Madiyev oshxona ochib, ish yurita boshladi. Boshida yaxshigina daromad kelayotgan joydan negadir baraka qochdi. Ishlar orqaga ketib, qarzga botishdi. Pulini so‘rab keladiganlar safi kengaydi, eshik qoqib qarzini so‘raydiganlar bezdirdi. Olganidan keyin beradi-da. Qarzlar ham oz miqdorda emasdi. Bu chigallik ularni firibgarlik qilishga chorladi. O‘zlarining ta’rifi bilan aytganda “shayton yo‘ldan urdi”. Irodasi kuchsiz aka-uka puli bor “o‘lja”ni izlay boshladi. Oshxonaga tez-tez kelib turadigan tanishi A.Ibragimovga tuzoq qo‘yishdi.
Rahim Madiyev tadbirkorga oshxonani 80 ming AQSh dollariga sotmoqchiligini aytdi. A.Ibragimovni cho‘chitib yubormaslik uchun “samimiyatini” ko‘rsatdi, ya’ni uni o‘ziga “do‘st” bilib, kimdan qancha qarzi borligini ham ochiq aytdi.
Soxta do‘stining gapiga uchgan A.Ibragimov unga ishondi. Rahim Madiyevga 25 ming AQSh dollarga baholangan uyi, 15 ming AQSh dollari bo‘lgan Nexia avtomashinasi, yana uning qarzini uzishi uchun kelishilgan pullarni ham berdi.
Hujjatlar rasmiylashtirildi. Oshxonani sotib olgan A.Ibragimov undan besh oy foydalana oldi, xolos.
Rejaga ko‘ra, Rahimning ukasi Rasul da’vo arizasi bilan sudga murojaat qildi. Hokim qarori bilan tasdiqlangan yer hujjati akasiga emas unga tegishli ekani, akasi undan so‘ramay oshxonani sotganini aytib qaytarib olib berishni so‘radi.
Haqiqiy firibgarlik keyin boshlandi. Rahim ham fuqarolik sudida ukasi Rasulning so‘zlarini tasdiqlab, oshxonani A.Ibragimovga sotmasdan garovga qo‘yganligi, oldi-sotdi shartnomasini garov shartnomasi, deb o‘ylab, o‘qimasdan imzolagani haqida guvohlik berdi. So‘ng 80 ming AQSh dollariga sotilgan oshxona shartnomasi sud orqali bekor qilindi.
A.Ibragimov shundagina aldanganini angladi.
Voqea o‘rganilganda, “Farg‘ona meros invest” xususiy korxonasi tarkibida faoliyat yuritgan oshxonaning egalik huquqi Rahim Madiyevda bo‘lgan. Ukasi esa unga bosh hisobchi hisoblangan. Aka-uka firibgarlar hujjatni bilinmaydigan shaklda qo‘lda o‘zgartirishga muvaffaq bo‘lgan. Notariuslarga taqdim etilgan hujjatlar tekshirilganda ularning siri fosh bo‘ldi.
Ularning tuzog‘iga yana bir ishbilarmon ilinadi. Birinchi sud qarori chiqqach, o‘zlariga tegishli, deb topilgan ushbu oshxonani E.G‘ofurovga 55 ming AQSh dollari va 11 million so‘mga qayta sotib yuboradi. Bu ham yetmagandan, firibgarlar oshxonani garovga qo‘yib bank muassasasidan juda ko‘p miqdorda kredit mablag‘i ham oladi.
“Haqiqat egiladi, bukiladi, lekin sinmaydi. Ishbilarmonlar uchun yaratilayotgan qulayliklardan unumli foydalanish o‘rniga, firibgarlik yo‘li bilan boylik orttirishni niyat qilgan aka-ukalarning qing‘ir ishi sud davomida to‘la fosh etildi. Bu jarayonda ishlash ham oson bo‘lmadi. Ish chigallashgan. Guvohlar tinglandi. Hujjatlar o‘rganildi. Ular hatto oila a’zolarini ham qing‘ir ishlariga aralashtirgan. Hammasini e’tiborga olib hukm chiqardik. Sud hukmi bilan firibgarlarning har biri 5 yilga ozodlikdan mahrum etilib, ular tomonidan yetkazilgan 516 million 364 ming 550 so‘m (65 ming AQSh dollari) jabrlanuvchi A.Ibragimov foydasiga solidar tartibda undiriladigan bo‘ldi”, — deydi Jinoyat ishlari bo‘yicha Farg‘ona viloyati Yozyovon tuman sudi raisi Bekzod Haydarov.
Jinoyat jazosiz qolmaydi, albatta. Ammo firibgarlik qilayotganlarning tuzog‘iga tushayotganlarning salomatligi yomonlashadi, vaqti ketadi, mablag‘ sarflaydi, haqiqat tiklanishi uchun yugurib-yeladi.
Nahotki qisqagina umr behuda narsalarga sarflash uchun berilgan bo‘lsa?! Buni anglash shu qadar qiyinmi?
Izoh (0)