Olimlar Sayvit toshida o‘yilgan sirli obyektning maqsadi borasida hali ham bir to‘xtamga kelmagan. Bu haqda “TravelAsk” xabar berdi.
Shahar modeli o‘yib ishlangan ulkan tosh tarixchilarning bir guruhi tomonidan tekshirilgan, biroq uning kelib chiqish talqini hali ham isbotlanmagan. Taxminlarga ko‘ra, toshga o‘yilgan arxitektura Inka madaniyatiga tegishli, biroq bir qator mutaxassislar uning undanda qadim davrga tegishli degan talqinni istisno qilmaydi.
Peru Sayvit toshi bu 4 ga 4 metrli bo‘lgan andezit monolitidir. Sayvit arxeologik majmuasidagi Apurimak mintaqasida joylashgan.
Toshning yuqori qismida shahar shakli juda puxtalik bilan ishlangan, Andezit vulqon jinslariga tegishli ekanligini hisobga olsak bu ishlov berish uchun juda qiyin bo‘lgan material hisoblanadi.
Sayvit toshida aniq ko‘rinadigan uylar, maydonlar, yo‘llar, qishloq xo‘jalik maydonlari, ayvonlar va hatto sug‘orish tizimini aniq ko‘rish mumkin.
Qizig‘i shundaki, suv kanallari va sug‘orish tizimi haqiqatga yaqin aks ettirilgan bo‘lib, haqiqiy kabi xizmat qiladi: yomg‘ir yog‘sa, suv oqimlari kanallarga kirib, maydonlarga o‘tadi va keyin toshdan shahar chetidan hosil bo‘lgan teshiklardan oqadi. Tosh ustida shahar tuzilmalaridan tashqari, hayvonot dunyosi tasviri ham aks etgan: maymun, ilon, qurbaqalar va boshqalar. Umuman olganda tosh ustida 200 ga yaqin figuralar mavjud.
Inkaning mashhur shahar va qal’alari orasida olimlar sirli Sayvit shaharining o‘xshashini topolmagan, ammo shahar shu kungacha vayron bo‘lishi mumkinligi ehtimoli ham mustasno emas. Shuning uchun, bu qadimiy shaharning bir nusxasi degan taxmin ham mavjud. Ehtimol, bu kelajakda qurilishi lozim bo‘lgan shaharning yagona maketi bo‘lib, u qurilmay qolib ketgan bo‘lishi ham mumkin.
Izoh (0)