Namangan viloyati Kosonsoy tumanida joylashgan 4-sonli maktabgacha ta’lim muassasasi kuz-qish mavsumiga tayyor emasligi, undagi jihozlar yaroqsiz holatga kelgani, biroq shunga qaramay bu yerda 100 nafar bola tarbiyalanayotgani haqida xabar berilgan edi.
O‘zbekiston Respublikasi maktabgacha ta’lim vazirligi ushbu muassasada tekshiruv o‘tkazdi. Bu haqda vazirlik matbuot xizmati “Daryo”ga xabar berdi.
Tekshiruv Namangan viloyati hokimi, viloyat IIB boshlig‘i, Kosonsoy tuman hokimi va prokurori ishtirokida o‘tkazildi.
Ushbu bog‘cha Kosonsoy tumani 26-sonli maktabgacha ta’lim muassasasining filiali sifatida 1971-yilda foydalanishga topshirilgan. (Xabarda aytilganidek 1975-yilda emas.)
2018-yilning 20-yanvarida tuman hokimining qaroriga ko‘ra bog‘cha to‘laqonli maktabgacha ta’lim muassasasi sifatida qayta tashkil etilgan.
“Maktabgacha ta’lim muassasasining kuz-qish mavsumiga tayyor emasligi haqidagi ma’lumot o‘z tasdig‘ini topmadi: Bolalar o‘tirgan binolarda havo harorati 20—22 daraja issiqni tashkil etdi. Qozonxona tuzatilgan va bino qo‘lbola isitish pechlari yordamida isitilmayapti.
Ayni paytda maktabgacha ta’lim vazirligi mutaxassislari kapital ta’mirlash uchun boshqalar bilan solishtirilganida eng yomon ahvoldagi maktabgacha ta’lim muassasasini tanlashiga to‘g‘ri keladi. Chunki barcha bog‘chalarni bir vaqtning o‘zida ta’mirlashning imkoni yo‘q.
Bundan tashqari, eski bog‘chani ta’mirlash uchun uni uzoq muddatga yopishga to‘g‘ri keladi. Hozirda Kosonsoy tumanidagi boshqa maktabgacha ta’lim muassasalarida 100 nafar bolani qabul qilish uchun joy yetmaydi. Tarbiyalanuvchilarni maktabgacha ta’lim muassasasiga qatnash imkoniyatidan mahrum etish ham noo‘rin”, — deyiladi xabarda.
Munosib shart-sharoitlar yaratish uchun 4-sonli maktabgacha ta’lim muassasasiga muntazam ravishda budjetdan pul ajratib kelinmoqda.
2018-yilda maktabgacha ta’lim muassasasiga 27,5 million so‘m ajratilgan, shundan 15,2 million so‘m isitish tizimini yaxshilash, 4,3 million so‘m joriy ta’mirlash ishlari uchun, 2,7 million so‘m yangi mebel, 3,4 million so‘m oshxona jihozlari, 1,9 million so‘m ko‘rpa-to‘shak va yotoqxona jihozlari sotib olish uchun mo‘ljallangan.
Bahor—kuz mavsumida tom bilan bog‘liq muammolar ko‘zga tashlanmagan. Undan suv oqishi 2019-yilning 16-yanvarida kuzatilgan. Ushbu muammo, shuningdek bino ustki qismi va ayrim joylarini, eletr ta’minoti tizimini ta’mirlash uchun Kosonsoy tumani mahalliy budjet mablag‘lari va tadbirkorlardan 500 million so‘m ajratgan.
Izoh (0)