Мактабгача таълим вазирлиги Косонсой туманидаги яроқсиз ҳолга келган боғчада текширув ўтказди (фото)

Наманган вилояти Косонсой туманида жойлашган 4-сонли мактабгача таълим муассасаси куз-қиш мавсумига тайёр эмаслиги, ундаги жиҳозлар яроқсиз ҳолатга келгани, бироқ шунга қарамай бу ерда 100 нафар бола тарбияланаётгани ҳақида хабар берилган эди.

Ўзбекистон Республикаси мактабгача таълим вазирлиги ушбу муассасада текширув ўтказди. Бу ҳақда вазирлик матбуот хизмати «Дарё»га хабар берди.

Текширув Наманган вилояти ҳокими, вилоят ИИБ бошлиғи, Косонсой туман ҳокими ва прокурори иштирокида ўтказилди.

Ушбу боғча Косонсой тумани 26-сонли мактабгача таълим муассасасининг филиали сифатида 1971 йилда фойдаланишга топширилган. (Хабарда айтилганидек 1975 йилда эмас.)

2018 йилнинг 20 январида туман ҳокимининг қарорига кўра боғча тўлақонли мактабгача таълим муассасаси сифатида қайта ташкил этилган.

«Мактабгача таълим муассасасининг куз-қиш мавсумига тайёр эмаслиги ҳақидаги маълумот ўз тасдиғини топмади: Болалар ўтирган биноларда ҳаво ҳарорати 20—22 даража иссиқни ташкил этди. Қозонхона тузатилган ва бино қўлбола иситиш печлари ёрдамида иситилмаяпти.

Айни пайтда мактабгача таълим вазирлиги мутахассислари капитал таъмирлаш учун бошқалар билан солиштирилганида энг ёмон аҳволдаги мактабгача таълим муассасасини танлашига тўғри келади. Чунки барча боғчаларни бир вақтнинг ўзида таъмирлашнинг имкони йўқ.

Бундан ташқари, эски боғчани таъмирлаш учун уни узоқ муддатга ёпишга тўғри келади. Ҳозирда Косонсой туманидаги бошқа мактабгача таълим муассасаларида 100 нафар болани қабул қилиш учун жой етмайди. Тарбияланувчиларни мактабгача таълим муассасасига қатнаш имкониятидан маҳрум этиш ҳам ноўрин», — дейилади хабарда.

Муносиб шарт-шароитлар яратиш учун 4-сонли мактабгача таълим муассасасига мунтазам равишда бюджетдан пул ажратиб келинмоқда.

2018 йилда мактабгача таълим муассасасига 27,5 миллион сўм ажратилган, шундан 15,2 миллион сўм иситиш тизимини яхшилаш, 4,3 миллион сўм жорий таъмирлаш ишлари учун, 2,7 миллион сўм янги мебел, 3,4 миллион сўм ошхона жиҳозлари, 1,9 миллион сўм кўрпа-тўшак ва ётоқхона жиҳозлари сотиб олиш учун мўлжалланган.

Баҳор—куз мавсумида том билан боғлиқ муаммолар кўзга ташланмаган. Ундан сув оқиши 2019 йилнинг 16 январида кузатилган. Ушбу муаммо, шунингдек бино устки қисми ва айрим жойларини, элетр таъминоти тизимини таъмирлаш учун Косонсой тумани маҳаллий бюджет маюлағлари ва тадбиркорлардан 500 миллион сўм ажратган.