“Yoshlar press klubi”ning yosh olimlar faoliyatidagi muammolar tahliliga bag‘ishlangan navbatdagi sessiyasi bo‘lib o‘tdi. Bu haqda “Daryo”ga Yoshlar media markazi ma’lum qildi.
Mazkur muloqotda yosh olimlar faoliyatidagi muammolarni bartaraf etish, mustaqil izlanuvchilarning ilmiy-nazariy hamda ilmiy-amaliy tadqiqotlari natijadorligini oshirish, yoshlarning ilm-fan yutuqlariga bo‘lgan qiziqishlarini qo‘llab-quvvatlashning samarali tizimini joriy etishga e’tibor qaratildi.
—Amaliyotda ishlab chiqarish subyektidagi muammolarni ulardan kelib chiqqan holda kadr tayyorlash, mana shu nazariyaning bozorga xizmat qilish mexanizmini qayta ko‘rib chiqish masalasi ustida ish olib borilyapti. Shuningdek, oliy ta’lim muassasalarining o‘quv va moddiy-texnik bazasi o‘rganib chiqildi. “3+1” loyihasi, ya’ni 3 yil nazariy, 1 yil amaliy ta’lim tizimiga o‘tish yo‘li va amaliyot soatlarini ko‘paytirish kabi bir necha takliflar berildi, — ta’kidladi “Respublika yosh olimlar Kengashi” NNT direktori Kamoliddin Mirzaaxmedov.
Tadbir davomida yosh olimlar bilan ishlashda innovatsion klasterga o‘tish kerakligi ta’kidlandi. Shuningdek, ishtirokchilar tomonidan innovatsion grantlar ajratilishi bilan bog‘liq kamchiliklar mavjudligi aytib o‘tildi.
— Ta’lim muassasalari uchun davomatni monitoring qiluvchi elektron tizim, elektron kutubxona, pochta xizmatining avtomatlashtirilgan tizimi, noyob kitoblarni o‘zbek, uyg‘ur va rus tillariga tarjima qiluvchi mobil ilovalar yaratuvchilariga mualliflik huquqi guvohnomasining topshirilishi yosh olimlarni qo‘llab-quvvatlashning yaqqol namunasidir. 26-aprel — Xalqaro intellektual mulk kunida ham bir qator yosh olimlar uchun maxsus guvohnomalarni taqdim etishni rejalashtirganmiz, — deydi Intellektual mulk agentligi mutaxassisi Sherzod Abdunabiyev.
Izoh (0)