Prezidentning 2018-yil 12-dekabrdagi farmoniga muvofiq, 2019 yil 1-yanvardan boshlab pensiyani hisob-kitob qilish uchun ish haqining maksimal miqdorini eng kam oylik ish haqining sakkiz barobaridan o‘n barobarigacha oshirish bo‘yicha yangi tizim joriy etildi. Mazkur hujjat bilan kimlarning pensiyasi oshadi? “Daryo” muxbirining savoliga Pensiya jamg‘armasi Namangan viloyat boshqarmasi pensiya va nafaqlarni tayinlash monitoringi va tahlili bo‘limi boshlig‘i Sherzodbek Qayumov javob berdi.
— 2019-yil 1-yanvarga qadar ishlovchilar ish haqidan Pensiya jamg‘armasiga sug‘urta badallari to‘lab kelgan va mazkur sug‘urta badallari Pensiya jamg‘armasi mablag‘larining shakllanish manbasi hisoblangan. Mehnat faoliyati davomida oylik ish haqi yuqori bo‘lgan ishchi-xodimlardan Pensiya jamg‘armasiga sug‘urta badallari ko‘proq, maoshi past bo‘lgan ishlovchilardan kamroq o‘tkazilgan. 2019-yil 1-yanvarga qadar pensiyalarni miqdorini hisoblab chiqishda eng kam oylik ish haqining 8 barobaridan ortiq bo‘lmagan miqdordagi o‘rtacha oylik ish haqi olinar edi. Farmon bilan 2009-yil 1-yanvardan boshlab pensiyalarni hisoblashda endi eng kam oylik ish haqining 10 barobaridan ortiq bo‘lmagan miqdordagi o‘rtacha oylik ish haqi olinadi. Bunda pensiyani hisoblashda aniqlangan o‘rtacha oylik ish haqi eng kam ish haqining sakkiz barobari, ya’ni 1621840 so‘mdan (202730 so‘m x 8) yuqori bo‘lgan pensiya oluvchilarning pensiyalari oshirildi.
Ushbu farmon joriy qilingunga qadar ishchi-xodimning o‘rtacha oylik ish haqi eng kam oylik ish haqining 8 barobaridan ortiq bo‘lgan qismi uchun Pensiya jamg‘armasiga sug‘urta badal to‘lagan bo‘lsa ham pensiya hisoblashda inobatga olinmas edi. 2019-yil 1-yanvardan boshlab ijtimoiy adolat mezonlariga tayangan holda ana shu to‘lagan sug‘urta badallarini pensiya hisoblashda inobatga olinishi natijasida yuqori miqdorda sug‘urta badali to‘lab kelgan pensiya oluvchilarning pensiyalari oshadi.
Misol uchun, o‘rtacha oylik ish haqi 2 200 000 so‘m va ish staji 35 yil bo‘lgan fuqaroga amaldagi tartib bo‘yicha pensiya hisoblashda 1 621 840 so‘m (eng kam ish haqining 8 barobari) inobatga olingan, qolgan qismi, ya’ni 578 160 so‘m hisobga olinmagan. Shundan kelib chiqib pensiyaning umumiy miqdori 1 054 196 so‘mni tashkil etar edi.
Yangi tartib bo‘yicha esa ushbu fuqaroga o‘rtacha oylik ish haqi 1 621 840 so‘m emas, 2 027 300 so‘m (eng kam ish haqining 10 barobari) miqdorida hisobga olinadi. Bunda pensiyaning umumiy miqdori 1 317 745 so‘mni tashkil etadi yoki 263 549 so‘mga oshadi.
Hozirda Namangan viloyati bo‘yicha jami 272 mingga yaqin pensiya va nafaqa oluvchilar bo‘lsa, mazkur farmon qabul qilingan kun holatiga 23 634 nafar pensionerning pensiyalari oshirildi. Pensiyaga endi chiqadiganlarni pensiyalari ushbu yangi tizim bo‘yicha hisoblanadi.
Izoh (0)