Buxoro shahrida mеhnat yarmarkasida 500 bo‘sh ish o‘rniga bor-yo‘g‘i 20 nafar yosh ishlash istagini bildirdi

Buxoro shahrida o‘tkazilgan mehnat yarmarkasida taklif qilingan 500 ta bo‘sh ish o‘rniga bor-yo‘g‘i 20 nafar yosh ishlash istagini bildirdi. Bu haqda “Daryo”ga O‘zbekiston yoshlar ittifoqi Buxoro viloyati Kengashi matbuot xizmati rahbari Zarnigor Nafiddinova ma’lum qildi.

Yoshlar bandligini ta’minlash dolzarb vazifa ekanligini inobatga olgan holda, qator korxona, tashkilotlar o‘z faoliyatini ayni shu maqsadga yo‘naltirgan. Bu borada “Bo‘sh ish o‘rinlari mehnat yarmarkalari” muhim vazifani o‘taydi.

7-yanvar kuni Buxoro yoshlar markazida ana shunday mehnat yarmarkasi o‘tkazilib, unga ish bilan band bo‘lmagan, uyushmagan yoshlar va asosan, bir oylik muddatli harbiy xizmatni o‘tab qaytgan yoshlar jalb etildi. Bunda 40 ta korxona va tashkilot 500 ta bo‘sh ish o‘rnini taklif qildi. Biroq, natija quvonarli emas. Yoshlar 500 ta bo‘sh ish o‘rnidan atigi 20 tasiga istak bildirishdi. 45 nafariga esa ishga joylashish uchun yo‘llanmalar berildi.

“‘Bo‘sh ish o‘rinlari’ mehnat yarmarkalari o‘tkazish an’anaga kirgan. Lekin natija doimo samarali bo‘ladi, deb ayta olmaymiz. Chunki taklif etilayotgan ish o‘rinlari yoshlarga ma’qul kelsa, uning maoshi ko‘ngildagidek bo‘lmasligi mumkin. Yoki aksincha, mehnati ko‘pu maoshi oz ish takliflari ham yo‘q emas. Bu esa fuqaroning turmushi to‘kisligini ta’minlashda muammolarga duch keltirishi, tabiiy. Shu nuqtai nazardan, yoshlar bandligini ta’minlash maqsadida ularni korxona va tashkilotlarga olib borib, ish tartibi va jamoa bilan joyning o‘zidayoq tanishtirib, ularni ishga joylashtirmoqchimiz”, — deydi Yoshlar ittifoqi viloyat Kengashi bo‘lim mudiri Sardor Rahimov.

Yarmarkada ko‘zga tashlangan yana bir jihat, taklif etilayotgan ishlar oliy ma’lumotli mutaxassislarni jalb etishga qaratilgan. O‘tkazilgan mehnat yarmarkasi esa o‘z maqsadiga ko‘ra, ish bilan band bo‘lmagan, uyushmagan yoshlar, shuningdek, muddatli harbiy xizmatni o‘tab qaytgan yoshlarga bo‘sh ish va mehnat o‘rinlarini taklif etishga qaratilgan. Mehnat yarmarkalari mas’ullari ish va mehnat o‘rinlarini taklif etayotganda ushbu jihatlarga e’tibor qaratmagan ko‘rinadi.