Mudofaa vazirligi Sport klubi stadionida “Vatanparvarlik oyligi” doirasida futbol musobaqasi bo‘lib o‘tdi. Unda faxriylardan tarkib topgan “Sergeli” va “Mudofaa vazirligi” futbol jamoalari g‘oliblik uchun to‘p surdi, deb xabar beradi vazirlik matbuot xizmati.
“Maydonda xuddi navqiron futbolchilardek harakat qilgan faxriylar to‘qnashuvi murosasiz tus oldi. O‘yin birinchi taymida himoyaviy-hujum taktikasiga asoslangan bo‘lsa-da, darvozalar daxlsizligicha qoldi: 0-0. Ikkinchi taymda “Mudofaa vazirgigi” jamoasi hisobni ochdi. Oradan ko‘p vaqt o‘tmay, “Sergeli” faxriylari jamoasi hisobni tenglashtirganiga qaramay, shu daqiqaning o‘zida raqib jamoa yana bir bor darvozabonni dog‘da qoldirishga erishdi: 2-1”, deyiladi xabarda.
“Sergeli”ning tinimsiz amalga oshirgan kombinatsiyalari natijasida, ular so‘nggi daqiqalarda gol urishga muvaffaq bo‘lib, hisobni tenglashtirgan. Qolgan daqiqalar ham teng kurashlar ostida kechdi. Asosiy vaqtda g‘olib aniqlanmagani tufayli hakam penaltilar seriyasiga start berdi. Penaltilar bo‘yicha “Mudofaa vazirigi” jamoasidan “Sergeli” 3-2 hisobida ustun keldi.
G‘oliblarga kubok, diplom va esdalik sovg‘alari topshirildi.
Izoh (0)