Президентнинг 2018 йил 12 декабрдаги фармонига мувофиқ, 2019 йил 1 январдан бошлаб пенсияни ҳисоб-китоб қилиш учун иш ҳақининг максимал миқдорини энг кам ойлик иш ҳақининг саккиз баробаридан ўн баробаригача ошириш бўйича янги тизим жорий этилди. Мазкур ҳужжат билан кимларнинг пенсияси ошади? «Дарё» мухбирининг саволига Пенсия жамғармаси Наманган вилоят бошқармаси пенсия ва нафақларни тайинлаш мониторинги ва таҳлили бўлими бошлиғи Шерзодбек Қаюмов жавоб берди.
— 2019 йил 1 январга қадар ишловчилар иш ҳақидан Пенсия жамғармасига суғурта бадаллари тўлаб келган ва мазкур суғурта бадаллари Пенсия жамғармаси маблағларининг шаклланиш манбаси ҳисобланган. Меҳнат фаолияти давомида ойлик иш ҳақи юқори бўлган ишчи-ходимлардан Пенсия жамғармасига суғурта бадаллари кўпроқ, маоши паст бўлган ишловчилардан камроқ ўтказилган. 2019 йил 1 январга қадар пенсияларни миқдорини ҳисоблаб чиқишда энг кам ойлик иш ҳақининг 8 баробаридан ортиқ бўлмаган миқдордаги ўртача ойлик иш ҳақи олинар эди. Фармон билан 2009 йил 1 январдан бошлаб пенсияларни ҳисоблашда энди энг кам ойлик иш ҳақининг 10 баробаридан ортиқ бўлмаган миқдордаги ўртача ойлик иш ҳақи олинади. Бунда пенсияни ҳисоблашда аниқланган ўртача ойлик иш ҳақи энг кам иш ҳақининг саккиз баробари, яъни 1621840 сўмдан (202730 сўм х 8) юқори бўлган пенсия олувчиларнинг пенсиялари оширилди.
Ушбу фармон жорий қилингунга қадар ишчи-ходимнинг ўртача ойлик иш ҳақи энг кам ойлик иш ҳақининг 8 баробаридан ортиқ бўлган қисми учун Пенсия жамғармасига суғурта бадал тўлаган бўлса ҳам пенсия ҳисоблашда инобатга олинмас эди. 2019 йил 1 январдан бошлаб ижтимоий адолат мезонларига таянган ҳолда ана шу тўлаган суғурта бадалларини пенсия ҳисоблашда инобатга олиниши натижасида юқори миқдорда суғурта бадали тўлаб келган пенсия олувчиларнинг пенсиялари ошади.
Мисол учун, ўртача ойлик иш ҳақи 2 200 000 сўм ва иш стажи 35 йил бўлган фуқарога амалдаги тартиб бўйича пенсия ҳисоблашда 1 621 840 сўм (энг кам иш ҳақининг 8 баробари) инобатга олинган, қолган қисми, яъни 578 160 сўм ҳисобга олинмаган. Шундан келиб чиқиб пенсиянинг умумий миқдори 1 054 196 сўмни ташкил этар эди.
Янги тартиб бўйича эса ушбу фуқарога ўртача ойлик иш ҳақи 1 621 840 сўм эмас, 2 027 300 сўм (энг кам иш ҳақининг 10 баробари) миқдорида ҳисобга олинади. Бунда пенсиянинг умумий миқдори 1 317 745 сўмни ташкил этади ёки 263 549 сўмга ошади.
Ҳозирда Наманган вилояти бўйича жами 272 мингга яқин пенсия ва нафақа олувчилар бўлса, мазкур фармон қабул қилинган кун ҳолатига 23 634 нафар пенсионернинг пенсиялари оширилди. Пенсияга энди чиқадиганларни пенсиялари ушбу янги тизим бўйича ҳисобланади.
Изоҳ (0)