Bugun, 9-yanvar kuni Xalqaro press klubning “Investitsiya—iqtisodiyot drayveri, uning yuragi: Islohotlar, muhim vazifalar va muammolar tahlili” deb nomlangan sessiyasi bo‘lib o‘tdi. Unda O‘zbekiston TIV vakillari, “O‘zbekenergo” AJ, “O‘ztransgaz” AJ rahbariyati, investorlar, tadbirkorlar va OAV vakillari ishtirok etdi.
“Daryo” muxbiri Sevara Nishonovaning xabar berishicha, ushbu sessiyada “Davyergeodezkadastr” qo‘mitasi raisi Abdushukur Abdullayev ham spiker sifatida ishtirok etgan. U shaharsozlikda investitsiyalarning tutgan o‘rni haqida gapira turib, uyi buziladigan fuqarolarga qanday tartibda kompensatsiya to‘lanishi masalasiga to‘xtaldi:
“Har bir shahar yoki hududini kengaytirish yoki mavjud infratuzilmani kengaytirish hisobiga rivojlanadi. Biz ham ushbu yo‘lni hozirda bosib o‘tmoqdamiz. Toshkent shahrida eski uylar judayam ko‘p. Agarda biz mana shu uylarni ta’mirlash uchun ma’lum summa yo‘naltirsak, qimmatga tushamiz. Undan ko‘ra bunday uylarni buzib o‘rniga yangisini qurganimiz osonroq.
Uylarni buzish qonunchulik doirasida amalga oshiriladi. Oldin bizda ko‘chmas mulk u turar joy bo‘ladimi, noturar joy bo‘ladimi ularga nisbatan inventar bahosi degan tushuncha bo‘lardi. 2018-yilda inventar bahoni kadastr bahosiga o‘gartirish uchun katta ishlar amalga oshirildi. Masalan, Toshkentda uch xonali uyning inventar bahosi avval 3 yarim million bo‘lgan. O‘zingizga ma’lumki, Toshkentda bu summaga uch xonali uy uyoqda tursin, bitta tovuq katakni ham qurib bo‘lmaydi. Shuning uchun ham uch xonali uyning kadastr bahosi hozirgi kunda 60 million so‘m atrofida etib belgilandi. Biroq, bu uyning kadastr bahosi ekanligi va u uyning bozordagi narxidan farq qilishini eslatib o‘tishim kerak. Agar fuqaroning uyi buzilsa, unga kompensatsiya bozor narxi miqdorida to‘lanadi. Uyning bozor narxi esa litsenziyaga ega bo‘lgan maxsus kompaniyalar tomonidan belgilanadi”.
Izoh (0)