Dunyodagi eng katta yuk kemalaridan biri Shimoliy dengizda zaharli ximikatlar solingan konteynerlarni yo‘qotdi

Dunyodagi eng yirik konteyner tashuvchi kemalardan biri — salkam 400 metrli MSC Zoe Shimoliy dengiz akvatoriyasiga o‘tish chog‘ida 270 ta konteynerni yo‘qotdi. Bu haqda “RBK” xabar bermoqda.

Panama bayrog‘i ostida suzgan va Portugaliyadan Germaniyaga yo‘l olgan yuk kemasi 2-yanvarga o‘tar kechasi po‘rtanaga duch kelgan.

Kamida 21 ta konteyner va uning ichidagilar — televizorlar, mebel va o‘yinchoqlar Niderlandiyaning Vliland hamda Tersxelling orollari qirg‘og‘iga borib yetgan. Yana bir qism konteynerlar Germaniyaning Borkum oroli sohili yaqinida payqalgan.

Kema olib ketayotgan 3 ta konteynerda zaharli va portlovchi kimyoviy birikmalar saqlangani bildirilmoqda.