Namangan viloyat musiqali drama teatri binosining kuz-qish mavsumida isitilmasligi jamoa faoliyatida qiyinchiliklar tug‘dirmoqda. Bu haqda O‘zA xabar berdi.
Binodagi isitish tizimining asosi – qozon yer ostida joylashgan bo‘lib, bu yong‘in xavfsizligi qonun-qoidalariga zid, degan xulosaga kelingan. Teatr ma’muriyati binoning isitish qozonini yerning ustki qismiga ko‘chirishda yordam so‘rab tegishli tashkilotlarga murojaat qilgan. Lekin mutasaddilar jim.
— Teatrda 30 yildan buyon ishlayman, — deydi Dilfuza Qodirova. — Faoliyat boshlaganimdan buyon isitish tizimidagi muammodan xabardorman. San’atni sevganimiz uchun qishning izg‘irinli kunlarida ham sovuqni sovuq demay,tomoshabinlar uchun spektakl tayyorlaymiz. Biz-ku mayli, qishki ta’til kunlari teatrga keladigan bolalar zax binoda o‘tirishga majbur bo‘lmoqda. Bunday sharoitda o‘tirgan bola bir soatli spektakl tugagunicha shamollab qolmasligiga kim kafolat beradi?
Teatr jamoasi ayni kunlarda “Qorboboning o‘g‘irlanishi” spektaklini yosh tomoshabinlar e’tiboriga havola etish harakatida. Sahnaning sovuq harorati ham ijodkorlarni shashtidan qaytarmayapti. Biroq sabr-toqatning ham chegarasi bor.
Izoh (0)