Наманган вилоят мусиқали драма театри биносининг куз-қиш мавсумида иситилмаслиги жамоа фаолиятида қийинчиликлар туғдирмоқда. Бу ҳақда ЎзА хабар берди.
Бинодаги иситиш тизимининг асоси – қозон ер остида жойлашган бўлиб, бу ёнғин хавфсизлиги қонун-қоидаларига зид, деган хулосага келинган. Театр маъмурияти бинонинг иситиш қозонини ернинг устки қисмига кўчиришда ёрдам сўраб тегишли ташкилотларга мурожаат қилган. Лекин мутасаддилар жим.
— Театрда 30 йилдан буён ишлайман, — дейди Дилфуза Қодирова. — Фаолият бошлаганимдан буён иситиш тизимидаги муаммодан хабардорман. Санъатни севганимиз учун қишнинг изғиринли кунларида ҳам совуқни совуқ демай,томошабинлар учун спектакл тайёрлаймиз. Биз-ку майли, қишки таътил кунлари театрга келадиган болалар зах бинода ўтиришга мажбур бўлмоқда. Бундай шароитда ўтирган бола бир соатли спектакл тугагунича шамоллаб қолмаслигига ким кафолат беради?
Театр жамоаси айни кунларда «Қорбобонинг ўғирланиши» спектаклини ёш томошабинлар эътиборига ҳавола этиш ҳаракатида. Саҳнанинг совуқ ҳарорати ҳам ижодкорларни шаштидан қайтармаяпти. Бироқ сабр-тоқатнинг ҳам чегараси бор.
Изоҳ (0)