Qoraqalpog‘istonda 50 mingta oilaga qish mavsumiga tayyorgarlik ko‘rishi uchun 20 mlrd so‘m ajratildi

Joriy yilning 15–16-noyabr kunlari davlat rahbari Shavkat Mirziyoyevning Qoraqalpog‘iston Respublikasiga tashrifi natijalari bo‘yicha mazkur hududdagi kam ta’minlangan oilalarni qish mavsumida yanada qo‘llab-quvvatlash borasida bergan topshiriqlari asosida Hukumat farmoyishi qabul qilindi. Bu haqda “Huquqiy axborot” kanali xabar berdi.

Farmoyishga ko‘ra, 2018-yil dekabr oyida Qoraqalpog‘iston Respublikasida yashayotgan ijtimoiy himoyaga muhtoj kam ta’minlangan 50 ming oilaga ko‘mir xarid qilish va ularga qish mavsumiga tayyorgarlik ko‘rish tadbirlari uchun moddiy yordam tariqasida 400 ming so‘mdan bir martalik to‘lovlar ajratiladi.

Mazkur tadbirlarni amalga oshirish uchun 20 milliard so‘m mablag‘ yo‘naltiriladi.

Ushbu mablag‘lar birinchi navbatda ijtimoiy nafaqa oluvchilarga, yolg‘iz pensionerlarga hamda Qo‘ng‘irot, Mo‘ynoq, Taxtako‘pir, Qorao‘zak tumanlaridagi ijtimoiy himoyaga muhtoj kam ta’minlangan oilalarga ajratilishi nazarda tutilgan.