Rus pravoslav cherkovi O‘rta Osiyo miropolit okrugi sinodi Ukraina prezidenti Pyotr Poroshenkoga yo‘llangan ochiq xatda Kiyevdan BMT Bosh Assambleyasining “Ma’rifat va diniy bag‘rikenglik” rezolyutsiyasiga rioya qilishni so‘radi, deb yozadi “Podrobno.uz”.
Sinod a’zolari xatda Ukraina kanonik pravoslav cherkovi hamda Konstantinopol patriarxati tomonidan yaratilayotgan parallel tuzilma yuzasidan xavotir bildirdi.
“Shu munosabat bilan Ukraina hokimiyatining qonunchilik va ijro tarmoqlariga murojaat qilib, BMT Bosh Assambleyasining “Ma’rifat va diniy bag‘rikenglik” maxsus rezolyutsiyasini imzolash doirasida olingan majburiyatlarga rioya qilishni so‘raymiz”, — deyiladi murojaatda.
Joriy yil 12-dekabr kuni BMT Bosh Assambleyasining yalpi sessiyasida “Ma’rifat va diniy bag‘rikenglik” deb nomlangan maxsus rezolyutsiya qabul qilindi. Loyihasi O‘zbekiston tomonidan ishlab chiqilgan hujjat BMTga a’zo barcha davlatlar tomonidan bir ovozdan qo‘llab-quvvatlandi.
Hujjatda dinlar, madaniyatlar va konfessiyalararo munosabatlardagi uyg‘unlikni rag‘batlantirish hamda ayrim shaxslarga nisbatan din va e’tiqodlar zamiridagi kamsitishlarga yo‘l qo‘yilishiga qarshi kurashishga qaratilgan barcha xalqaro, mintaqaviy va milliy tashabbuslar qo‘llab-quvvatlanadi.
Izoh (0)