18 декабрнинг асосий янгиликлари — «Дарё» дайжестида.
Ижтимоий тармоқларда Тошкент метросининг «Алишер Навоий» бекатида бир қизнинг рельсга тушиб кетиши акс этган видео тарқалди. Тошкент шаҳар ИИББ расмий ахборотига кўра, ушбу ҳодиса жорий йилнинг 29 июлида юз берган. 20 ёшли Гулбаҳор Б. ҳушини йўқотиб, яқинлашиб келаётган метро электропоезди рельсига тушиб кетган. Машинист шошилинч тормоз беришни қўллаган, натижада фожианинг олди олинган. Жабрланувчи арзимас шикастланишлар билан қутулиб қолди.
***
Тошкентдаги Зарқайнар мажмуаси аукцион савдоларига қўйилди. 2005 йилда қурилган ушбу бино бир пайтлар Ўзбекистоннинг Биринчи Президенти Ислом Каримовнинг тўнғич қизи Гулнора Каримовага тегишли эди. Ушбу мажмуа ҳозирги кунда «Ўзбекнефтгаз» миллий холдинг компанияси томонидан тасарруф этилади. Лотнинг бошланғич нархи 87,9 миллиард сўмни ташкил этди. Закалат миқдори - 4,3 миллиард сўм. Аризалар 23 январга қадар қабул қилинади. Аукцион эса 25 январь куни бўлиб ўтади.
***
Ўзбекистонда бу йил талабалар қайси санадан қишки таътилга чиқиши маълум қилинди. Талабалар одатдагидек 28 декабрдан қишки таътилга кетади ва у 10 январга қадар давом этади. 27 декабрь охирги ўқиш куни, 11 январь куни эса таълим муассасаларида дарслар бошланади.
***
Владимир Путиннинг ваколати оширилди. Давлат думаси соддалаштирилган схема асосида президент томонидан Россия фуқаролигига номзодларни танлаш ҳуқуқини берувчи қонун лойиҳасини учинчи, якуний ўқишда қабул қилди. Владимир Путин Россия фуқаролигини беришни либераллаштириш ҳақида июнь ойида эълон қилганди. Унинг сўзларига кўра, ушбу жараённи соддалаштириш турли муаммоларни, биринчи навбатда демографик муаммони ҳал этишда ёрдам беради.
***
Қуръони каримнинг 900 йиллик нусхаси топилди. Эрон Ислом Республикасининг Теҳрон шаҳридаги музейда Қуръони каримнинг XII асрга тегишли нусхаси намойиш этилди. Ушбу нусха 1150 йилга тегишли бўлиб, хаттот Абул Фаҳр ибн Абилфазл ал-Зафароний томонидан кўчирилган ва унга Зафароний нусхаси деб ном берилган.
Изоҳ (0)