Senat raisi “Ma’muriy qamoqni o‘tash tartibi to‘g‘risida”gi qonun ijrosi sustkashlik bilan bajarilayotganini tanqid qildi

2017-yilning 10-yanvar kuni “Ma’muriy qamoqni o‘tash tartibi to‘g‘risida”gi Qonun O‘zbekiston Prezidenti tomonidan imzolangan edi.

O‘sha paytda mas’ul tuzilmalar Qonun ijrosini ta’minlashga tayyor emasligi, buning uchun vaqt va zarur mablag‘lar talab etilishi bois, uning amalga kirish muddati 2019-yil 10-yanvar etib belgilangan edi. Xo‘sh, Qonunning kuchga kirishiga bir oydan kam vaqt qoldi, tayyorgarlik nihoyasiga yetkazildimi?

“Daryo” muxbiri Sevara Nishonovaning xabar berishicha, Senat raisi Nig‘matilla Yo‘ldoshev mutasaddilar tomonidan yuqoridagi qonun ijrosi sust ta’minlanayotganini tanqid qildi.

“Qonun kuchga kirguniga qadar Vazirlar Mahkamasi tomonidan tasdiqlangan dasturga asosan ma’muriy qamoqqa olingan shaxslarni saqlash uchun mo‘ljallangan maxsus qabulxonalar binolarini qurish va rekonstruksiya qilish lozim edi.

Bugungi kunda zarur mablag‘lar ajratilganiga qaramay, mazkur muassasalarni qurish ishlari mamlakat bo‘yicha 20 foizga ham bajarilmagan.

Ayniqsa, Buxoro viloyatida qurilish va rekonstruksiya ishlari 30, Qoraqalpog‘iston va Qashqadaryoda 25, Navoiyda 15, Toshkent viloyatida esa, 10 foizga bajarilganini qanday izohlash mumkin?!

Ushbu muassasalarni malakali kadrlar, jihozlar va boshqa vositalar bilan ta’minlash ishlaridagi sustkashlikni esa izohlashga hojat yo‘q, deb hisoblaymiz.

Qonunga bo‘lgan bunday munosabatdan keyin uning ijrosi haqida gapirish mumkinmi?Umuman, mutasaddilar ikki yil davomida Qonun ijrosiga tayyorgarlik ko‘rish bo‘yicha nima ish qilindi, degan savolga qanday javob beradilar?!”, — deydi Senat raisi.