Toshkent shahar prokuraturasi va Toshkent shahar bojxona boshqarmasi bilan hamkorlikda O‘zbekiston Respublikasi Prezidentining joriy yil 2-avgustdagi “O‘zbekiston Respublikasida amalga oshirilayotgan soliq va bojxona islohotlarini huquqiy qo‘llab-quvvatlash chora-tadbirlari to‘g‘risida”gi Farmoni ijrosi doirasida amalga oshirilayotgan chora-tadbirlar bilan tadbirkorlik subyektlari hamda ommaviy axborot vositalarini yaqindan tanishtirish maqsadida ochiq muloqot va media tur tashkil etildi. Bu Bojxona qo‘mitasi axborot xizmati xabar berdi.
Tadbir davomida jurnalistlar dastlab Toshkent viloyati Zangiota tumanida tashkil qilingan Highway Logistics Center transport logistika markazida tadbirkorlar ishtirokida o‘tkazilgan ochiq muloqotga bevosita guvoh bo‘lishdi. Shundan so‘ng, jurnalistlar markaz faoliyati bilan yaqindan tanishtirildi.
Uchrashuv davomida ishtirokchilarga tizimdagi korrupsiya va tamagirlik holatlariga qarshi kurashishda jamoatchilikning ham faol ko‘magi zarurligi, unga qarshi birgalikda kurashish kerakligi, bu borada bojxona, prokuratura va soliq organlari tomonidan har qanday amaliy va huquqiy jihatdan ko‘mak berilishi, kunning istalgan vaqtida ushbu idoralarning “Ishonch telefon”lari orqali murojaat qilishlari mumkinligi alohida qayd etildi.
Tadbir so‘ngida bojxona ishi va ishbilarmonlik muhitini yanada takomillashtirish, aholi va tadbirkorlik subyektlariga har tomonlama qulayliklar yaratish bo‘yicha davlat organlari har qanday ko‘mak berishga, korrupsiya va boshqa har qanday illatlarga qarshi kurashishda keng hamkorlik qilish muhimligi, bundan har bir tadbirkorlik subyekti va jamiyatning har bir a’zosi manfaatdor ekanligi ta’kidlandi.