O‘zbekistondagi davlat tadbirlarida san’atkorlarning chiqishi jonli ijroda bo‘ladi

8-dekabrdan boshlab ilk marotaba O‘zbekistonda barcha davlat tadbirlari jonli ijroda o‘tkaziladi. Bu haqda “O‘zbekkonsert” davlat muassasasi direktori Odil Abduqahhorov ma’lum qildi, deya xabar beradi “Turon 24”.

“San’atkorlar O‘zbekistondagi davlat tadbirlarida asosan fonogramma orqali ijro etardi. Biz bu an’anani to‘xtatib, jonli ijroni birinchi o‘ringa olib chiqmoqchimiz. 8-dekabrdan boshlab barcha davlat tadbirlari jonli ijroda o‘tkaziladi. O‘zbekiston Respublikasi konstitutsiyasi qabul qilinganining 26 yilligiga bag‘ishlangan davlat tadbirida birinchi marta yangi an’anani joriy qilamiz. Kelgusida bo‘lib o‘tadigan Navro‘z, Mustaqillik bayramlari va boshqa davlat tadbirlari ham jonli ijroda o‘tkaziladi. Davlat tadbirlarida ishtirok etadigan san’atkorlarning 70 foizi yosh ijrochilar bo‘ladi. Bundan maqsad jonli ijroning qadrini oshirish va yosh san’atkorlarni qo‘llab quvvatlashdir”, deydi Odil Abduqahhorov.

Ma’lumot uchun, Shavkat Mirziyoyev ishtirok etadigan O‘zbekiston Respublikasi konstitutsiyasi qabul qilinganining 26 yilligiga bag‘ishlangan davlat tadbiri 6 yoki 7-dekabr kunlari bo‘lishi rejalashtirilmoqda.