Ўзбекистондаги давлат тадбирларида санъаткорларнинг чиқиши жонли ижрода бўлади

8 декабрдан бошлаб илк маротаба Ўзбекистонда барча давлат тадбирлари жонли ижрода ўтказилади. Бу ҳақда «Ўзбекконцерт» давлат муассасаси директори Одил Абдуқаҳҳоров маълум қилди, дея хабар беради «Turon 24».

«Санъаткорлар Ўзбекистондаги давлат тадбирларида асосан фонограмма орқали ижро этарди. Биз бу анъанани тўхтатиб, жонли ижрони биринчи ўринга олиб чиқмоқчимиз. 8 декабрдан бошлаб барча давлат тадбирлари жонли ижрода ўтказилади. Ўзбекистон Республикаси конституцияси қабул қилинганининг 26 йиллигига бағишланган давлат тадбирида биринчи марта янги анъанани жорий қиламиз. Келгусида бўлиб ўтадиган Наврўз, Мустақиллик байрамлари ва бошқа давлат тадбирлари ҳам жонли ижрода ўтказилади. Давлат тадбирларида иштирок этадиган санъаткорларнинг 70 фоизи ёш ижрочилар бўлади. Бундан мақсад жонли ижронинг қадрини ошириш ва ёш санъаткорларни қўллаб қувватлашдир», дейди Одил Абдуқаҳҳоров.

Маълумот учун, Шавкат Мирзиёев иштирок этадиган Ўзбекистон Республикаси конституцияси қабул қилинганининг 26 йиллигига бағишланган давлат тадбири 6 ёки 7 декабрь кунлари бўлиши режалаштирилмоқда.