2017-yili O‘zbekistonda 1900 kishi OITS tufayli vafot etdi

2017-yili O‘zbekistonda taxminan 1900 kishi OITS tufayli vafot etdi. Bu haqda BMTning OIV/OITS bo‘yicha birlashgan dasturi — YuNEYDS ma’lumotlariga tayanib, AQShning O‘zbekistondagi elchixonasi ma’lum qildi.

“Amerika Qo‘shma Shtatlari O‘zbekistonda bu halokatli kasallikka qarshi 2001-yildan buyon mahalliy va xalqaro hamkorlar bilan birga kurashib kelmoqda, buning natijasida biz birgalikda ko‘plab kishilar hayotini saqlab qoldik. Qo‘shma dasturlarimiz tufayli O‘zbekistondagi yana ko‘plab kishilar bu kasallikni o‘z vaqtida aniqlash, sifatli parvarish, hayotiy zarur antiretrovirus davolanish hamda o‘z jamoalaridan ijtimoiy ko‘mak olishga muvaffaq bo‘ldi. Birgina 2017-yili O‘zbekistondagi 20 000 dan ortiq kishi Qo‘shma Shtatlar asosiy hamkor sanalgan Global jamg‘arma mexanizmi orqali antiretrovirus davolanish imkoniga ega bo‘ldi”, — ta’kidladi AQShning muvaqqat ishonchli vakili Alan Melser.

Ma’lumot uchun, 1-dekabrda OITSga qarshi kurash xalqaro kuni nishonlandi.