Shayx hazratlarining asarlari Rossiyada tasdiqlangan islomiy adabiyotlar ro‘yxatiga kiritildi

Shayx hazratlarining asarlari Rossiyada tasdiqlangan islomiy adabiyotlar ro‘yxatiga kiritildi, deb xabar beradi “Islom.uz” portali.

Gap shundaki, bu ro‘yxat Rossiya Federatsiyasidagi jazoni ijro etish muassasalari mahkumlari uchun tuzilgan yangi islomiy adabiyotlar ro‘yxati hisoblanadi. Tataristonning Bulg‘or shahrida Rossiya Jazoni ijro etish federal xizmati (JIFX) qoshida markazlashgan musulmon tashkilotlari bilan o‘zaro hamkorlik qilish bo‘yicha ishchi guruhining yig‘ilishi o‘tkazildi.

Yig‘ilishda jazoni ijro etish tizimi muassasalari kutubxonalari fondini to‘ldirish uchun islomiy adabiyot ro‘yxati tasdiqlandi. Tasdiqlangan kitoblar ro‘yxatidan Qur’oni karimning ma’nolari tarjimalari, Payg‘ambarimiz sollallohu alayhi vasallamning hayot faoliyatlari, ahli sunnatning mazhablari, islom fiqhi kabi islomiy adabiyotlar o‘rin olgan. Shuningdek, ro‘yxatdan mumtoz va zamonaviy yozuvchilarning mashhur diniy-ma’rifiy asarlari, diniy qarashlari zamonaviy talqinda aks ettirilgan badiiy adabiyotlar ham joy olgan.

Ma’lum bo‘lishicha, ishchi guruhi tomonidan adabiyotlar ro‘yxati uch qismga bo‘lingan. Birinchi qismga tegishli kitoblar jazoni ijro etish muassasasining ibodat qiladigan xonasida turadi. Ikkinchi qismga tegishli kitoblar esa muassasaning kutubxonasi fondida turadi va mahbuslar ularni buyurtma berish orqali olib o‘qishlari mumkin. Uchinchi qismga tegishli bo‘lgan maxsus kitoblarni imom-domlalar o‘zlari bilan muassasaga olib keladilar. Adabiyotlar ro‘yxatiga jami 150 ta yangi kitob kiritilgan bo‘lib, shu tariqa mahbuslarga diniy mavzuda qiziqarli har qanday adabiyotdan keng foydalanish imkoniyati yaratilmoqda.

O‘tgan davr mobaynida “Al-Vasatiya – muvozanat” markazi tomonidan RF jazoni ijro etish muassasalari uchun ko‘plab islomiy adabiyotlar tayyorlanib, yetkazib berilgan. Jumladan, 42 ta musulmon mualliflarining asarlari katta adadlarda nashr etilib JIMga bepul tarqatilgan.

Muhim jihati shundan iboratki, Rossiya Federatsiyasi jazoni ijro etish muassasalarida turishi zarur bo‘lgan kitoblar qatoridan, aynan mana shu “Al-Vasatiya – muvozanat” markazi tavsiyasiga ko‘ra, marhum ustozimiz Shayx Muhammad Sodiq Muhammad Yusuf rohimahullohning uchta kitoblari ham o‘rin olgan. Bular “Vasatiya – put jizni”, “Islam, Iman, Koran” va “Raznoglasiya: prichini i resheniya” kitoblaridir. Bu kitoblar jazoni ijro etish muassasidagi ibodat qilish xonalarida turishi kerak bo‘lgan birinchi qism kitoblar ro‘yxatiga kiritildi. Bu ro‘yxatdan jami 24 ta kitob o‘rin olgan.

Shuningdek, Markaz tomonidan Shayx hazratning “Otkritoye poslaniye”, “Religiya – nasixa”, “Xadisi i jizn, 1 tom”, “Schastlivaya semya” nomli kitoblari ham jazoni ijro etish muassasalari kutubxonasi fondlarida saqlanishiga tavsiya qilingan. “Al-Vasatiya – muvozanat” markazining ko‘rsatmasiga binoan, bu kitoblar barchaga tushunarli, ravon tilda yozilgan bo‘lib, imom-domlalarning izohlab berishlariga hojat yo‘q.

IslamNews xabariga ko‘ra, ushbu federal xizmat qoshidagi ishchi guruh ozodlikdan mahrum etish joylarida o‘tkaziladigan diniy-ma’rifiy tadbirlarning monitoringini olib borish, qamoqxonalardagi imomlarning faoliyatiga ko‘maklashish, muassasa xodimlarining malakasini oshirishda ishtirok etishadi. Ishchi guruh doimiy asosda ish olib borib har chorakda hisobotlar taqdim etib turiladi. Tinglovchilarni islom tarixi, musulmon madaniyati va islom axloqi bilan tanishtirishadi.