Chiroqchi tumanidagi maktablarga berilgan ko‘mir briketlar kesak bo‘lib chiqdi

Qashqadaryo viloyatining Chiroqchi tumanidagi 93-umumta’lim maktabiga berilgan 11 tonna ko‘mir briket bir tutab, kesakka aylanmoqda. Bu holat maktablardagi kuz-qish mavsumiga tayyorgarlikni o‘rganayotgan Turon24 muxbirlari surishtiruvi chog‘ida aniqlandi.

“Joriy kuz-qish mavsumi uchun kelgan ko‘mir briket bir yonib o‘chadi, hech qanday issiqligi yo‘q, — deydi maktab o‘t yoquvchisi Xolbo‘ta Sheraliyev. — Eng yomoni bir tutab, kesakka aylanadi. Shu bois ham qancha yoqmaylik, sinfxonalar isimaydi”.

Xolbo‘ta Sheraliyev maktabga kuz-qish mavsumida yoqish uchun berilgan go‘yoki briket-ko‘mirlar bo‘lgan briket shaklidagi kesaklarni ko‘rsatdi. “Mana briket bir yonib, shunday shaklga kiradi”, — deydi o‘t yoquvchi.

Maktab direktori To‘ra Tursunovning ma’lum qilishicha, 93-maktabda 16 ta sinfxona mavjud. Maktabda 440 nafar o‘quvchi tahsil oladi. Maktab jamoasi kuz-qish mavsumi boshlangan bo‘lsa-da, sinf xonalari umuman isimayotganini aytdi.

“Maktabimizning kuz-qish mavsumiga tayyorgarligi qoniqarsiz darajada. Qancha ko‘mir yoqsak ham sinf xonalari isimaydi. Chunki ko‘mir sifatsiz. Briketlarda issiqlik yo‘q. Cho‘g‘ bo‘lmaydi. Ko‘mir briketlar kesak bo‘lsa, qanday yonishi mumkin?”, — deydi maktab direktori.

O‘qituvchilar o‘zlari pul yig‘ib, sinfxonalarni isitadigan zamonaviy qozonxona qurish taklifi bilan chiqqan.

“Tashabbuskor o‘qituvchilarga mening yuragim bitta, bunday ish qilolmayman deb aytdim, — deydi To‘ra Tursunov. — Xo‘p, pul yig‘ildi ham deylik. Lekin qaysidir o‘qituvchi ko‘chaga chiqib, direktor o‘qituvchilardan pul yig‘ayapti degan gapni aytadimi? Shuning uchun bu taklifni qo‘llab-quvvatlamadim”.

“Xonamiz sovuq bo‘lganligi uchun ham har bir sinf o‘zi pul yig‘ib, elektr pechi sotib olayapti, — deydi tumandagi 118-maktab o‘quvchisi O‘g‘iloy Xolmurodova. — Sinfxonamiz sovuqligi sababli tez-tez shamollab qolyapmiz. Bu esa davomatimizga ham ta’sir ko‘rsatmoqda”.

Maktab o‘quvchilaridan yana birining aytishicha, sinfxonadagi isitish tizimi qizimaydi. Shuning uchun o‘quvchilar qalin kiyimda o‘tirishga majbur. Imkoni bo‘lmagach, o‘quvchilar o‘zaro pul yig‘ib, elektr pech sotib olgan.