Қашқадарё вилоятининг Чироқчи туманидаги 93-умумтаълим мактабига берилган 11 тонна кўмир брикет бир тутаб, кесакка айланмоқда. Бу ҳолат мактаблардаги куз-қиш мавсумига тайёргарликни ўрганаётган Turon24 мухбирлари суриштируви чоғида аниқланди.
«Жорий куз-қиш мавсуми учун келган кўмир брикет бир ёниб ўчади, ҳеч қандай иссиқлиги йўқ, — дейди мактаб ўт ёқувчиси Холбўта Шералиев. — Энг ёмони бир тутаб, кесакка айланади. Шу боис ҳам қанча ёқмайлик, синфхоналар исимайди».
Холбўта Шералиев мактабга куз-қиш мавсумида ёқиш учун берилган гўёки брикет-кўмирлар бўлган брикет шаклидаги кесакларни кўрсатди. «Мана брикет бир ёниб, шундай шаклга киради», — дейди ўт ёқувчи.
Мактаб директори Тўра Турсуновнинг маълум қилишича, 93-мактабда 16 та синфхона мавжуд. Мактабда 440 нафар ўқувчи таҳсил олади. Мактаб жамоаси куз-қиш мавсуми бошланган бўлса-да, синф хоналари умуман исимаётганини айтди.
«Мактабимизнинг куз-қиш мавсумига тайёргарлиги қониқарсиз даражада. Қанча кўмир ёқсак ҳам синф хоналари исимайди. Чунки кўмир сифатсиз. Брикетларда иссиқлик йўқ. Чўғ бўлмайди. Кўмир брикетлар кесак бўлса, қандай ёниши мумкин?», — дейди мактаб директори.
Ўқитувчилар ўзлари пул йиғиб, синфхоналарни иситадиган замонавий қозонхона қуриш таклифи билан чиққан.
«Ташаббускор ўқитувчиларга менинг юрагим битта, бундай иш қилолмайман деб айтдим, — дейди Тўра Турсунов. — Хўп, пул йиғилди ҳам дейлик. Лекин қайсидир ўқитувчи кўчага чиқиб, директор ўқитувчилардан пул йиғаяпти деган гапни айтадими? Шунинг учун бу таклифни қўллаб-қувватламадим».
«Хонамиз совуқ бўлганлиги учун ҳам ҳар бир синф ўзи пул йиғиб, электр печи сотиб олаяпти, — дейди тумандаги 118-мактаб ўқувчиси Ўғилой Холмуродова. — Синфхонамиз совуқлиги сабабли тез-тез шамоллаб қоляпмиз. Бу эса давоматимизга ҳам таъсир кўрсатмоқда».
Мактаб ўқувчиларидан яна бирининг айтишича, синфхонадаги иситиш тизими қизимайди. Шунинг учун ўқувчилар қалин кийимда ўтиришга мажбур. Имкони бўлмагач, ўқувчилар ўзаро пул йиғиб, электр печ сотиб олган.
Изоҳ (0)