Namangan viloyatida qish mavsumi kelmay turib elektr ta’minotidagi uzilishlar ko‘payib, viloyat elektr tarmoqlari korxonasiga jismoniy va yuridik shaxslar tomonidan murojaatlar soni ortib bormoqda. Bu haqda “Turon 24” xabar berdi.
Korxonaning “Ishonch telefoni”ga noyabr oyining 12 kuni davomida elektr ta’minotidagi uzilishlar yuzasidan 840 ta qo‘ng‘iroq qayd etilgan. Ular asosan Namangan shahri, Uychi, Namangan, Mingbuloq, To‘raqo‘rg‘on, Yangiqo‘rg‘on va Kosonsoy tumanlariga to‘g‘ri kelmoqda.
“Kuniga 3-4 marotaba, kamida 2 soatdan o‘chadi. Ustiga-ustak, elektr quvvati ham 220 volt emas, yarmisiga to‘g‘ri kelayotgan bo‘lsa kerak, chunki lampochka doim qizarib turadi. Ertalab, endi nonushta qilib, ishga jo‘naydigan paytingiz o‘chadi. Kechki payt ishdan charchab kelib, televizor ko‘raman deganingizda yana shu ahvol”, deydi Namangan shahridagi “Bunyodkor” mahallasida istiqomat qiluvchi Shahlo Mirzayeva.
“Namangan tumani markazi Toshbuloqdagi maktablarning birida ishlayman. Maktabda svet yonib-o‘chaverganidan kompyuterlarda ishlashning iloji yo‘q. Plastikdagi pulni nakd kilish uchun bankka borsak, u yerda ham svet yo‘q, turnaqator navbat. Uyni-ku, aytmasa ham bo‘ladi, o‘chib-yonaverganidan elektr priborlarimiz ishdan chiqyapti. Ishdan kech qaytganda qorong‘ida ovqat qilishga to‘g‘ri kelyapti”, deydi ismi-sharifini ochiqlashni istamagan o‘qituvchi ayol.
Shu tumandagi “Sohibkor” mahallasida yashovchi O‘ktamxon G‘afforovaning aytishicha, elektr kuniga 5-6 marta o‘chib-yonadi, har gal 2-3 soatga. 18 noyabr, yakshanba kuni esa ertalab 9 lar atrofida o‘chgan svet soat 15 dan keyin yongan.
Uychi tumanining markazdan 3 kilometr uzoqda joylashgan “Gulbog‘” mahallasidagi kottejlarda yashovchi aholi har ikki soatda 2 soatdan svet o‘chayotganidan nolidi. “Namunali uylarda o‘tirsak, uy uchun falon pul kredit to‘lasak, bu nima ahvol?” deya e’tiroz bildirmoqda ular.
Shu tumanning Yorkatay, Xo‘jaobod, Yorqo‘rg‘on, Chortoq tumanining Muchum qishloqlarida kuniga 8-9 marotaba svet o‘chishi odatiy holga aylandi. Aholi bunga “elektrning ham svetofordan farqi qolmadi”, deya izoh bermoqda.
Elektr energiyasidagi uzilishlar kasalxonalar, hatto hokimlik idoralarida ham kuzatilmoqda. Namangan shahridagi yuqumli kasalliklar shifoxonasida davolanayotgan, o‘zini Azimjon deb tanishtirgan bemorning aytishicha, 20-noyabr kuni soat 12.00 lar atrofida o‘chgan svet oradan 4 soat o‘tib yongan. Bu yerda kuniga har 3-4 soatda bir marta, kamida bir soatdan o‘chadi.
Tumanlardan biridagi hokimlikning ism-sharifini ochiqlamagan xodimining aytishicha, bu yerda ham elektr ta’minotidagi uzilishlar odatiy holga aylangan.
“Kompyuterda endi biror ma’lumotni tayyorlab, viloyatga uzatamiz deb turganda svet o‘chadi. Majlisga odam aytgani bezillab qoldik, chunki svet o‘chsa, o‘z-o‘zidan mikrofon ishlamaydi, zal sovib ketadi”, — deydi u.
“Namangan hududiy elektr tarmoqlari korxonasi” AJ taqsimlash-elektr tarmoqlari xizmati boshlig‘i Tohirjon Yusufjonov buni mamlakat issiqlik elektr stansiyalaridan biridagi ta’mirlash ishlari bilan izohladi.
“Tallimarjon issiqlik elektr stansiyasida ishlab chiqarish quvvati 800 megavatt bo‘lgan blok ta’mirga chiqarildi. Shuning uchun kechki maksimum paytlarida, soat 18.00 dan 22.00 gacha qisqa — 20 daqiqadan 1 soatgacha cheklovlar kiritilmoqda. Bu tadbir uzoq davom etmaydi. Lekin qishning sovuq kunlarida ertalabki va kechki maksimum soatlarida, favqulodda holatlarda ham cheklovlar kiritilishi mumkin”, — deydi Tohirjon Yusufjonov.
Mutasaddiga ko‘ra, cheklovlar asli elektr tarmoqlari korxonasi uchun ham ovoragarchiliklar va ortiqcha xarajatlarga sabab bo‘ladigan amaliyot. Chunki viloyatdagi podstansiyalarga bog‘langan 300 nafar navbatchi topshiriqqa binoan ularni o‘chirib-yoqadi, navbatchilar bo‘lmagan manzillarga esa brigada yuboriladi. O‘chirib-yoqilaverganidan so‘ng qurilmalarni joriy va mukammal ta’mirlashga ehtiyoj seziladi.
Tohirjon Yusufjonov olinayotgan elektr energiyasi hajmi oshganini aholi va tadbirkorlik subyektlari orasida energiya iste’moli ko‘paygani bilan tushuntirmoqda. Uning aytishicha, viloyatda keyingi vaqtda 10 dan oshiq iqtisodiy va sanoat zonalari ishga tushirilgani, ularda o‘nlab yangi korxonalar ish boshlaganini e’tiborga olish zarur.
Tohirjon Yusufjonov yuzaga kelayotgan muammolarga sharh berar ekan, aholining katta qismi uyni isitish va ovqat qilish uchun elektr energiyasidan foydalanayotgani, shahar sharoitida asosan “issiq pol”, konditsionerlar va isitgichlar qo‘llanayotgani, shuningdek, energiya tejovchi lampalardan foydalanish kutilgan darajada hali ommalashmaganini ta’kidlamoqda.
Uning aytishicha, kelgusi yili To‘raqo‘rg‘on IESning birinchi navbati ishga tushganidan so‘ng ushbu muammolarning aksari hal bo‘ladi. Bir kunda 21,6 million, bir oyda 648 million kilovatt-soat elektr energiyasi ishlab chiqaradigan inshoot Farg‘ona vodiysining elektrga bo‘lgan ehtiyojini 60-70 foizga qoplaydi.
Hozircha esa yuzaga kelgan sharoitda Namangan bozorlarida yog‘och-o‘tin va pechkalar savdosi avjiga chiqdi. Pechkalarni holatiga qarab 50 mingdan 100 ming so‘mgacha, ularning karnaylarini esa 6-8 ming so‘mdan xarid qilish mumkin. Bitta motorollyor yoki yengil mashinadagi terak o‘tinlari 200-250 ming so‘m, o‘rik va boshqa mevali daraxtlar o‘tini esa 300-400 ming so‘mdan sotilmoqda.
Izoh (0)