Oliy Majlis Qonunchilik palatasida hukumat a’zolari ishtirokida deputatlar tomonidan O‘zbekistonning bosh moliyaviy hujjati loyihasi — soliq va byudjet siyosatining asosiy yo‘nalishlari ko‘rib chiqildi. Yig‘ilishda bosh vazir Abdulla Aripov ishtirok etdi. Bu haqda “Daryo”ga palata matbuot xizmati ma’lum qildi.
Muhokamalar davomida Qonunchilik palatasi deputati Rasul Kusherbayev bosh vazirga murojaat etib, Ukrainaning o‘zbek avtomobillariga nisbatan qo‘ymoqchi bo‘layotgan cheklovlariga qarshi deputatlarning munosabati va bildirgan taklifi bo‘yicha hukumat tomonidan qanday choralar ko‘rish rejalashtirilayotganligini so‘radi. Deputat agar zarur bo‘lsa hukumat Ukraina mahsulotlari importi o‘rnini bosuvchi mahsulotlar ishlab chiqaruvchi boshqa mamlakatlar bilan savdo-iqtisodiy munosabatlarni yo‘lga qo‘yish maqsadga muvofiq ekanligini bildirib o‘tdi.
Bosh vazir deputatning ushbu taklifiga javoban mamlakatda Prezident Shavkat Mirziyoyev rahbarligida uzoq va yaqin qo‘shni mamlakatlar bilan o‘zaro manfaatli savdo-iqtisodiy aloqalarni olib borishga alohida e’tibor qaratilayotganligi, shu bois Ukraina parlamenti tomonidan ko‘tarilib, mamlakat hukumatiga kiritilgan O‘zbekiston avtomobillariga qarshi cheklov o‘rnatish bo‘yicha choralarga qarshi har qanday chora qo‘llashda vazminlik va bosiqlik bilan ish tutish zarurligini ma’lum qildi.
Hukumat rahbari o‘z so‘zida ayni vaqtda O‘zbekistondagi tegishli vazirlik va idoralar Ukraina tomoni bilan mazkur masalada aniq yechimga kelish ustida ishlayotganligi va yaqin vaqt ichida tomonlar o‘zaro manfaatli to‘xtamga kelishiga ishonch bildirdi.
Izoh (0)