Олий Мажлис Қонунчилик палатасида ҳукумат аъзолари иштирокида депутатлар томонидан Ўзбекистоннинг бош молиявий ҳужжати лойиҳаси — солиқ ва бюджет сиёсатининг асосий йўналишлари кўриб чиқилди. Йиғилишда бош вазир Абдулла Арипов иштирок этди. Бу ҳақда «Дарё»га палата матбуот хизмати маълум қилди.
Муҳокамалар давомида Қонунчилик палатаси депутати Расул Кушербаев бош вазирга мурожаат этиб, Украинанинг ўзбек автомобилларига нисбатан қўймоқчи бўлаётган чекловларига қарши депутатларнинг муносабати ва билдирган таклифи бўйича ҳукумат томонидан қандай чоралар кўриш режалаштирилаётганлигини сўради. Депутат агар зарур бўлса ҳукумат Украина маҳсулотлари импорти ўрнини босувчи маҳсулотлар ишлаб чиқарувчи бошқа мамлакатлар билан савдо-иқтисодий муносабатларни йўлга қўйиш мақсадга мувофиқ эканлигини билдириб ўтди.
Бош вазир депутатнинг ушбу таклифига жавобан мамлакатда Президент Шавкат Мирзиёев раҳбарлигида узоқ ва яқин қўшни мамлакатлар билан ўзаро манфаатли савдо-иқтисодий алоқаларни олиб боришга алоҳида эътибор қаратилаётганлиги, шу боис Украина парламенти томонидан кўтарилиб, мамлакат ҳукуматига киритилган Ўзбекистон автомобилларига қарши чеклов ўрнатиш бўйича чораларга қарши ҳар қандай чора қўллашда вазминлик ва босиқлик билан иш тутиш зарурлигини маълум қилди.
Ҳукумат раҳбари ўз сўзида айни вақтда Ўзбекистондаги тегишли вазирлик ва идоралар Украина томони билан мазкур масалада аниқ ечимга келиш устида ишлаётганлиги ва яқин вақт ичида томонлар ўзаро манфаатли тўхтамга келишига ишонч билдирди.
Изоҳ (0)