O‘zbekistonning kelajakdagi iqtisodiy rivojlanish taqdiri o‘z qo‘lida. Bu haqda Xalqaro valyuta fondi vakli Yuxa Kaxkonnen Toshkentda O‘zbekiston banklari va Xalqaro valyuta fondi vakillari bilan bo‘lib o‘tgan uchrashuvda ma’lum qildi, deya xabar beradi Sputnik.
“Bugungi mavjud sharoitlarda O‘zbekistonning iqtisodiy rivojlanishiga tashqi omillar kam ta’sir qiladi. Rivojlanish asosan O‘zbekiston ichida o‘tkazilayotgan islohotlar natijalariga bog‘liq”, — dedi Kaxkonnen.
Shuningdek,XVF vakili O‘zbekistonning hududdagi boshqa mamlakatlarga nisbatan tashqi davlat qarzining nisbatan kamligi va katta salohiyati borligiga e’tibor qaratdi.
“O‘zbekistonda kutilayotgan soliq islohoti soliq to‘lovchilar tarkibini kengaytirishga, soliqlar yig‘ishni yaxshi va shaffosh qilishga olib kelishi kerak. Shu bilan birga, bugungi kunda soliq to‘layotgan iqtisodiyot subyektlariga nisbatan soliq bosimining oshishiga olib kelmasligi kerak. Aks holda, aksincha natija — daromadni soliqdan yashirish kelib chiqishi mumkin”, — dedi Yuxa Kaxkonnen soliq islohoti borasida berilgan savolga javoban.
Shu bilan birga, Yuxa Kaxkonnen O‘zbekiston Markaziy banki faoliyatini ijobiy baholab, mamlakatda islohotlar o‘tkazilayotgan murakkab sharoitda Markaziy bank to‘g‘ri moliyaviy siyosat olib borib, inflyatsiyani imkon qadar past darajada ushlab turishga muvaffaq bo‘layotganini e’tirof etdi.
Izoh (0)