Ўзбекистоннинг келажакдаги иқтисодий ривожланиш тақдири ўз қўлида. Бу ҳақда Халқаро валюта фонди вакли Юха Кахконнен Тошкентда Ўзбекистон банклари ва Халқаро валюта фонди вакиллари билан бўлиб ўтган учрашувда маълум қилди, дея хабар беради Sputnik.
«Бугунги мавжуд шароитларда Ўзбекистоннинг иқтисодий ривожланишига ташқи омиллар кам таъсир қилади. Ривожланиш асосан Ўзбекистон ичида ўтказилаётган ислоҳотлар натижаларига боғлиқ», — деди Кахконнен.
Шунингдек,ХВФ вакили Ўзбекистоннинг ҳудуддаги бошқа мамлакатларга нисбатан ташқи давлат қарзининг нисбатан камлиги ва катта салоҳияти борлигига эътибор қаратди.
«Ўзбекистонда кутилаётган солиқ ислоҳоти солиқ тўловчилар таркибини кенгайтиришга, солиқлар йиғишни яхши ва шаффош қилишга олиб келиши керак. Шу билан бирга, бугунги кунда солиқ тўлаётган иқтисодиёт субъектларига нисбатан солиқ босимининг ошишига олиб келмаслиги керак. Акс ҳолда, аксинча натижа — даромадни солиқдан яшириш келиб чиқиши мумкин», — деди Юха Кахконнен солиқ ислоҳоти борасида берилган саволга жавобан.
Шу билан бирга, Юха Кахконнен Ўзбекистон Марказий банки фаолиятини ижобий баҳолаб, мамлакатда ислоҳотлар ўтказилаётган мураккаб шароитда Марказий банк тўғри молиявий сиёсат олиб бориб, инфляцияни имкон қадар паст даражада ушлаб туришга муваффақ бўлаётганини эътироф этди.
Изоҳ (0)