Tasavvur qiling do‘konga kirib, tanlagan mahsulotingizning shtrix kodi ustidan telefon yurgizsangiz, ushbu mahsulot haqida to‘liq ma’lumot sizga taqdim etilmoqda. Telefoningizda mahsulotning aniq qachon ishlab chiqarilgan sanasi, kim tomonidan, qanday usullar bilan rastagacha yetib kelgani haqidagi ma’lumotlar muhayyo bo‘ladi. Bu trek-end-treysi dasturining sharofati bo‘lib, ushbu dastur yaqin yillar ichida O‘zbekistonda ham qo‘llanilishi mumkin, deyiladi O‘zA xabarida.
Britaniyaning Crown Agents kompaniyasi aynan shu va boshqa yangi innovatsion yechimlarni O‘zbekistonda turli tarmoqlarda qo‘llashni rejalashtirgan.
Kompaniyaning Markaziy Osiyo mintaqasi bo‘yicha menejeri Larisa Kokarevaning aytishicha bu dastur fermer dalasidan to do‘kon rastasigacha bo‘lgan yo‘lning litsenziyalanishini talab etadi. Bu esa o‘z-o‘zidan hududda ochiq iqtisodiyotning yuzaga kelishiga turtki beradi. O‘zbekistonda ham bu usulni qo‘llash mumkin. O‘zbekiston qishloq xo‘jaligi mahsulotlarini xaridorga yetkazib berishda blokcheyn usulidan foydalanish orqali, ularni eksport qilish salohiyatini ham oshirish yengillashadi. Yevropa bozorlarida qo‘llana boshlangan bu usul, mahsulotga nisbatan xaridorning ishonchi ortishiga yordam beradi. Qishloq xo‘jaligi mahsulotlarini tashqi bozorlarga olib chiqishda esa bu juda muhim sanaladi.
Mahsulotni ishlab chiqaruvchidan xaridorgacha bo‘lgan yo‘lini elektronlashtirish dori vositalari sotuvida ham ancha qo‘l keladi. Xaridor sotib olmoqchi bo‘lgan dori vositasining dorixonagacha bo‘lgan yo‘lini bilishga qiziqishi tabiiy.Bu “zanjirli” yo‘lni amalga oshirishda Crown Agents kompaniyasi O‘zbekiston bilan hamkorlik qilish niyatida. Kompaniya mamlakatdagi qishloq xo‘jaligi imkoniyatlari va ularga innovatsion texnologiyalarni jalb qilish yo‘llarini o‘rganmoqda. Crown Agents’ning xalqaro eksperti Yekaterina Silantyevaning fikricha bu usul kamida besh yil ichida O‘zbekistonda to‘liq amalga oshirilishi kutilmoqda.
“Texnologiyalar tez yangilanib boradi. Kamida 2 yil ichida trek-end-treysi usulini iqtisodiyotda qo‘llab, uni to‘liq amalga oshish muddatini 5 yil deb belgilash lozim. Aks holda u o‘z dolzarbligini yo‘qotadi. Chunki texnologiyalar kun sayin yangilanib bormoqda ”, — deydi Yekaterina Silantyeva.
Ma’lumot uchun: Crown Agents Kompaniyasi, 185 yildan buyon faoliyat yuritib keladi. Markaziy Osiyoda esa 25 yildirki Turkmaniston, Qirg‘iziston, Qozog‘iston kabi davlatlarda turli loyihalarni joriy etyapti. U Markaziy Osiyodagi faoliyati davomida miqdori 700 million dollarga teng 32 ta loyihani amalga oshirgan. Xalqaro kompaniya dunyo bo‘ylab turli mamlakatlar hukumatlariga barqarorlikni ta’minlash, sog‘liqni saqlash tizimini yaxshilashga yo‘naltirilgan konsalting xizmatlarini ham ko‘rsatib keladi.
Izoh (0)