Samarqandda maktab direktoriga og‘ir jarohat yetkazilishi oqibatida jabrlanuvchi hayotdan ko‘z yumgani to‘g‘risida xabar bergan edik. Viloyatning Urgut tumani, Beshyog‘och qishlog‘ida 30-oktabr kuni sodir bo‘lgan qotillikni “Daryo” muxbiri Farhod Norbo‘tayev voqea joyida o‘rgandi.
Ma’lum bo‘lishicha, Beshyog‘och qishlog‘ida sodir bo‘lgan mazkur mudhish voqeaga ikki tomon o‘rtasida yer talashish sabab bo‘lgan. O‘zaro tortishuv natijasida marhumning yon qo‘shnisi, 1998-yilda tug‘ilgan Sh.M. 15-umumta’lim maktabi direktori, 1986-yilda tug‘ilgan Anvar Yunusovni boshiga bolta bilan urishi oqibatida maktab direktori voqea joyida hayotdan ko‘z yumgan. Mazkur qotillik sodir etilgan vaqtda Sh.M.ning akasi, 1993-yilda tug‘ilgan M.M ham bo‘lgan.
Marhum Anvar Yunusov direktorlikdan tashqari “Akmal Boynazarov” fermer xo‘jaligida ish yurituvchi bo‘lib ham ishlab kelgani aytilmoqda.
— Anvar Yunusov va Mirkomil Sherboyev (Sh.M va M.M.ning otasi) fermer xo‘jaligidagi yer uchun bir necha yildan buyon o‘zaro tortishib kelayotgandi. Mahalla ikki tomon o‘rtasidagi kelishmovchilikni bartaraf etish maqsadida 2-3 marotaba ularni yarashtirib qo‘ygan. Shundan so‘ng biz bu nizoga barham berilgan deb yurardik, — deydi 15-umumta’lim maktabi o‘qituvchisi Yahyo Ro‘ziqulov. — Marhum direktorni ham, uning o‘limiga sababchi bo‘lganlarni ham o‘zim o‘qitganman. Hammasi esli-hushli bolalar edi. Muammoni o‘zaro kelishuv asosida hal qilsa bo‘lardi.
Mahalla uchastka noziri Quronboy Muhammadiyevning ta’kidlashicha, yer masaladagi kelishmovchilik yuzasidan ikkala tomon ham murojaat qilmagan. Biroq, joriy yilning iyul—avgust oylarida Mirkomil Sherboyev mast holatda marhum Anvar Yunusovning uyiga kelib janjal qilgan va derazalarini sindirib ketgan. Ushbu holat yuzasidan marhumning rafiqasi uchastka noziriga murojaat qilgan. Shundan so‘ng holat o‘rganilib, Mirkomil Sherboyev ma’muriy javobgarlikka tortilgan va eng kam ish haqining 3 barobari miqdorida jarima ham to‘lagan.
— Qotillik sodir bo‘lgan kuni Urgut tuman IIB tezkor vakillari bilan voqea joyini o‘rgandik. O‘rganishlar jarayonida Sh.M marhumning boshiga bolta bilan ikki bor qattiq zarba berganligi aniqlandi, — deydi uchastka noziri. — Ayni paytda voqea ishtirokchilari tuman IIBga olib ketilgan. Holat yuzasidan surishtiruv ishlari olib borilmoqda.
Marhum A.Yunusovning 3 nafar farzandi bo‘lib, dekabr oyida to‘rtinchi farzandi ham dunyoga kelishini kutayotgan bo‘lgan. Qishloq ahlining ta’kidlashicha, direktorning rafiqasi ayblanuvchilarning qarindoshi bo‘lgan. Voqea sodir bo‘lgan kuni jabrlanuvchilar (A.Yunusovning yaqinlari) achchiq ustida ayblanuvchilarning molxonasiga o‘t yoqib yuborgan.
Fojiadan keyingi mulohaza: nahotki Urgut tuman hokimligi, tuman fermerlar uyushmasi, yer resurslari va davlat yer-mulk kadastri tumandagi fermer xo‘jaliklarining yer maydonini aniqlab bermagan bo‘lsa? Bu ish o‘z holiga tashlab qo‘yilgan bo‘lsa, kelgusida yana qancha muammolar kelib chiqishini tasavvur qilishning o‘zi mushkul.
“Daryo” Urgut tuman hokimligining mazkur holat bo‘yicha munosabatini kutib qoladi.
Izoh (0)