Yaqinda ish boshlagan Islom Karimov nomidagi Toshkent davlat texnika universitetining Qo‘qon filialiga 125 nafar yoshlar talabalikka qabul qilindi. Bu haqda O‘zA xabar berdi.
O‘zbekiston Respublikasi Vazirlar Mahkamasining 2018-yil 22-sentabrdagi “Islom Karimov nomidagi Toshkent Davlat texnika universitetining Qo‘qon filialini tashkil etish to‘g‘risida” qarori asosida Qo‘qon shahrida tashkil etilgan mazkur filial ham ana shu ishlarning amaliy samarasidir.
Filial hududlarda ham sanoat mahsulotlarini ishlab chiqarish sohasi uchun malakali kadrlar tayyorlash tizimini joylarda tashkil etishni yanada takomillashtirish va sifatini yaxshilash maqsadiga xizmat qilishi bilan ahamiyatlidir.
Filialda 2018—2019-o‘quv yili uchun talabalar kontingenti Andijon, Namangan va Farg‘ona viloyatlarida doimiy yashayotgan, respublika oliy ta’lim muassasalariga belgilangan ta’lim yo‘nalishlarining mos va turdosh ta’lim yo‘nalishlariga hujjat topshirgan.
Ayni kunlarda talabalarni o‘z mutaxassisliklari bo‘yicha yetarli bilim olishlari uchun barcha sharoitlar yaratilmoqda, zarur o‘quv adabiyotlar, zamonaviy o‘quv-laboratoriya jihozlari va kompyuter texnikasi bilan ta’minlash ishlari olib borilmoqda.
O‘quv maskanida talabalar elektr texnikasi, elektr mexanikasi va elektr texnologiyalari, elektronika va asbobsozlik, materialshunoslik va yangi materiallar texnologiyasi, texnologik mashinalar va jihozlar va elektron apparaturalar ishlab chiqarish texnologiyasi kabi 5 ta ta’lim yo‘nalishida tahsil olmoqda.
Izoh (0)