Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan Namangan viloyati Pop tumani “Pop paxta tozalash” kompaniyasi mansabdor va moddiy javobgar shaxslarining jinoiy rejalariga nuqta qo‘yildi. Bu haqda, Bosh prokuratura huzuridagi Axborot-tahlil multimedia markaziga asoslanib, UzNews xabar bermoqda.
O‘tkazilgan tezkor tadbirda paxta topshirish maskani brigadiri Furqat Rahimov “Shamsiddin-Dildora” fermer xo‘jaligida terilgan paxta xomashyosi ostiga yashirilgan 1 tonna tuproq va qumni o‘tkazib berish evaziga Shuhrat Usmonovdan 300 AQSh dollari va 400 ming so‘mni olib, qum va tuproqni jamiyat hududiga tushirib chiqqan vaqtida ashyoviy dalillar bilan qo‘lga olingan.
Shuningdek, tezkor tadbir jarayonida tumandagi “Oltin zamin Rasul” va “Abdurashid ota T” fermer xo‘jaliklarining paxta xomashyolari olib kelingan transport vositalarining har birida polietilen qoplarda bo‘lgan 1 tonnadan tuproq va qum borligi aniqlangan. Umuman, uchta fermer xo‘jaligi tomonidan 3 tonna qum va tuproq shu kuni sotilgan 9,694 million so‘mlik paxta xomashyosi o‘rniga o‘tkazilganligi aniqlangan.
Yuqoridagi holat yuzasidan “Pop paxta tozalash” kompaniyasi qoshidagi paxta topshirish maskani brigadiri Furqat Rahimov va kompaniyaning boshqa mansabdor hamda moddiy javobgar shaxslariga nisbatan Jinoyat kodeksining 167-moddasi 2-qismi “v” bandi bilan jinoyat ishi qo‘zg‘atilib, tergov harakatlari olib borilmoqda.
Izoh (0)