24-oktabr kuni O‘zbekiston Mudofaa vazirligi Harbiy harakatlar boshqarmasi Toshkent harbiy okrugi qo‘mondonligi va “O‘zbekiston temir yo‘llari” AJ bilan birgalikda Angren shahridagi “Ablik” temir yo‘l bekatida harbiy texnikalarni vagonlarga yuklash (tushirish)ni ko‘rgazmali mashg‘ulot tarzida ko‘rsatib berdi. Bu haqda Mudofaa vazirligi matbuot xizmati “Daryo”ga ma’lum qildi.
Mashg‘ulot davomida harbiy texnikalarni temir yo‘l platformalariga ortish va tushirish tajribalar amalda namoyish etildi.
Shu bilan bir qatorda harbiy texnikalarni tashish vaqtida qo‘riqlash uchun ajratiladigan ko‘chma qorovulga mo‘ljallangan yopiq vagonning eski va yangi turdagi vagon loyihasi ko‘rsatildi.
Mudofaa vaziri Abdusalom Azizovning ko‘rsatmasiga muvofiq ushbu vagon harbiy texnika va yuklarni qo‘riqlab ketish uchun tayinlangan va harbiy xizmatchilardan iborat ko‘chma qorovul shaxsiy tarkibi uchun yanada qulay shart-sharoitlarni yaratish maqsadida zamon talablariga mos ravishda jihozlandi.
Harbiy harakatlar boshqarmasi boshlig‘i podpolkovnik Akbar Sobirovning ma’lum qilishicha, bu turdagi zamonaviy maxsus vagonlarning yana ikkitasi Toshkent yo‘lovchi vagonlarini qurish va ta’mirlash zavodi bilan hamkorlikda jihozlanib, bir oy ichida foydalanishga topshirilishi rejalashtirilgan.
Izoh (0)