O‘zbekistonda E-factura tizimi tajribadan o‘tkazilmoqda

Toshkent viloyati Chirchiq shahri, Navoiy va Sirdaryo viloyatlari hududida barcha xo‘jalik yurituvchi subyektlar tomonidan elektron hisobvaraq fakturalarini majburiy tartibda rasmiylashtirishni joriy etish bo‘yicha tajriba o‘tkazilmoqda. Bu haqda O‘zA xabar berdi.

Navoiy viloyati davlat soliq boshqarmasida o‘tkazilayotgan tajriba-sinov jarayonlari mazmun-mohiyatiga bag‘ishlangan amaliy seminar tashkil etildi.

Soliq tizimi mutaxassislari, viloyatdagi korxona va tashkilotlarning buxgalteriya sohasi vakillari ishtirokida o‘tgan seminarda internet tarmog‘ida yaratilgan E-factura tizimining afzalliklari xususida tushuncha berildi. Eksperiment o‘tkazish davrida xo‘jalik yurituvchi subyektlarga hisobvaraq fakturalari, tovar-transport yukxatlari va tovar-moddiy boyliklarni olish uchun ishonchnomalarni elektron shaklda taqdim etish bilan bir vaqtda qog‘oz shaklida tuzish huquqi beriladi.

– Yangi tizim rivojlangan mamlakatlar tajribasi asosida amaliyotga joriy etilmoqda, – deydi Davlat soliq qo‘mitasi huzuridagi Malaka oshirish markazi katta o‘qituvchisi F.Rahimov. – Endilikda ishlab chiqaruvchi va xizmat ko‘rsatayotgan korxonalar uchun www.soliq.uz saytida E-factura xizmati ham joriy etildi. Hisobvaraq fakturalari mazkur tizim imkoniyatlaridan foydalanib shakllantirilgach, u elektron raqamli imzo bilan tasdiqlanadi. Ushbu hujjatda, shuningdek, avtomatik tarzda aks etadigan maxsus QR-kod uning yagona va haqiqiy ekanini ko‘rsatib turadi.