24 октябрь куни Ўзбекистон Мудофаа вазирлиги Ҳарбий ҳаракатлар бошқармаси Тошкент ҳарбий округи қўмондонлиги ва «Ўзбекистон темир йўллари» АЖ билан биргаликда Ангрен шаҳридаги «Аблик» темир йўл бекатида ҳарбий техникаларни вагонларга юклаш (тушириш)ни кўргазмали машғулот тарзида кўрсатиб берди. Бу ҳақда Мудофаа вазирлиги матбуот хизмати «Дарё»га маълум қилди.
Машғулот давомида ҳарбий техникаларни темир йўл платформаларига ортиш ва тушириш тажрибалар амалда намойиш этилди.
Шу билан бир қаторда ҳарбий техникаларни ташиш вақтида қўриқлаш учун ажратиладиган кўчма қоровулга мўлжалланган ёпиқ вагоннинг эски ва янги турдаги вагон лойиҳаси кўрсатилди.
Мудофаа вазири Абдусалом Азизовнинг кўрсатмасига мувофиқ ушбу вагон ҳарбий техника ва юкларни қўриқлаб кетиш учун тайинланган ва ҳарбий хизматчилардан иборат кўчма қоровул шахсий таркиби учун янада қулай шарт-шароитларни яратиш мақсадида замон талабларига мос равишда жиҳозланди.
Ҳарбий ҳаракатлар бошқармаси бошлиғи подполковник Акбар Собировнинг маълум қилишича, бу турдаги замонавий махсус вагонларнинг яна иккитаси Тошкент йўловчи вагонларини қуриш ва таъмирлаш заводи билан ҳамкорликда жиҳозланиб, бир ой ичида фойдаланишга топширилиши режалаштирилган.
Изоҳ (0)