O‘zbek tiliga davlat tili maqomi berilgan sana munosabati bilan Mudofaa vazirligida “Til – millat ko‘zgusi” nomli ma’rifiy tadbir o‘tkazildi. Bu haqda vazirlik matbuot xizmati “Daryo”ga ma’lum qildi.
Unda Mudofaa vazirligi huzuridagi Jamoatchilik kengashi a’zosi, O‘zbekiston xalq artisti Afzal Rafiqov, “Muhammad Yusuf” nomidagi jamoat fondi raisi Nazira as-Salom, tarjimon Ma’suma Ahmedova hamda xonanda Aziz Rajabiy ishtirok etdi.
Tadbir davomida Afzal Rafiqov Alisher Navoiy, Bobur g‘azallaridan, Hofiz Sheroziy, Firdavsiy kabi buyuklar ijodidan o‘zbek tiliga qilingan g‘oyatda jozibador, ohangdor tarjimalardan o‘qib berdi.
Shuningdek, so‘z san’ati imkoniyatlaridan unumli foydalangan shoirlarimiz Abdulla Oripov, Erkin Vohidovlarning asarlaridan ham namunalar keltirdi. Xonanda Aziz Rajabiy ijrosidagi o‘zbek tilining nafis va ohangdorligini, go‘zalligini ifoda etuvchi she’r va g‘azallarga bastalangan qo‘shiqlari yig‘ilganlar olqishiga sazovor bo‘ldi.
Tadbir doirasida Mudofaa vazirligida ko‘chma kitob yarmarkasi ham tashkil qilindi.
Bu kabi tadbirlar sana munosabati bilan vazirlik qo‘shinlarida ham keng o‘tkazildi.
Izoh (0)