O‘zbekiston terma jamoasi III yozgi o‘smirlar Olimpiya o‘yinlarini 206 mamlakat ichida 13-o‘rin bilan yakunladi

Argentinaning Buenos-Ayres shahrida III yozgi o‘smirlar Olimpiya o‘yinlari nihoyasiga yetdi. O‘yinlar yakuniga ko‘ra o‘zbekistonlik yosh sportchilar tomonidan 14 ta medal (yana 2 ta medal mikst bahslarida: 1 ta oltin, 1 ta bronza) qo‘lga kiritildi. Ularning 4 tasi oltin, 4 tasi kumush va 6 ta bronza medallaridir.

Ma’lumot uchun, ushbu Olimpiya o‘yinlarida o‘zbekistonlik sportchilar yangi yo‘nalishlarda ham medallarga sazovor bo‘la oldi. Jumladan, bungacha O‘zbekiston o‘smirlar Olimpiadasida og‘ir atletika bo‘yicha xech qachon oltin medal qo‘lga kiritmagandi. Shuningdek, o‘zbekistonlik qizlar ham sport kurashlari bo‘yicha medallarga ega chiqa olmagandi. Baydarka va kanoeda eshkak eshish bo‘yicha ham avvalgi Olimpiya o‘yinlarida medallar qo‘lga kiritilmagan. Bu safar eshkak eshuvchilar oltin va kumush medallarga ega chiqdi.

O‘yinlar davomida o‘zbekistonlik sportchilar 14 ta medal (mikst bahslaridagi ikkita medal hisoblanmaydi)qo‘lga kiritdi. Taqqoslash uchun, 2014-yilgi o‘smirlar Olimpiadasida o‘zbekistonlik sportchilar 10 ta medalga ega chiqqan va yakunda medallar sifati bo‘yicha 27-o‘rinni egallagandi. Bu safargi o‘yinlarda O‘zbekiston terma jamoasi o‘z pozitsiyasini yanada yaxshiladi va jahonning 206 mamlakati ichida 13-o‘rindan joy oldi. Bu orqali O‘zbekiston o‘smirlar Olimpiya o‘yinlaridagi o‘z rekordini yangiladi.

Terma jamoa Osiyoda beshinchi, MDHda uchinchi, Markaziy Osiyo davlatlari ichida birinchi bo‘la oldi. Qo‘shni mamlakatlar ichida eng yaqin ta’qibchi Qozog‘iston terma jamoasi 10 ta medal bilan (4 ta oltin, 3 ta kumush, 3 ta bronza) 15-o‘rindan joy oldi. Qirg‘iziston esa 3 ta medal (2 ta kumush, 1 ta bronza) bilan 69-pog‘onadan o‘rin oldi. 1 ta bronza medalini qo‘lga kiritgan Afg‘oniston vakillari 90-o‘rinni egallashdi. Yana ikki qo‘shni davlat Tojikiston va Turkmaniston terma jamoasi vakillari medallar qo‘lga kirita olmadi.