Ўзбекистон терма жамоаси III ёзги ўсмирлар Олимпия ўйинларини 206 мамлакат ичида 13-ўрин билан якунлади

Аргентинанинг Буэнос-Айрес шаҳрида III ёзги ўсмирлар Олимпия ўйинлари ниҳоясига етди. Ўйинлар якунига кўра ўзбекистонлик ёш спортчилар томонидан 14 та медаль (яна 2 та медаль микст баҳсларида: 1 та олтин, 1 та бронза) қўлга киритилди. Уларнинг 4 таси олтин, 4 таси кумуш ва 6 та бронза медалларидир.

Маълумот учун, ушбу Олимпия ўйинларида ўзбекистонлик спортчилар янги йўналишларда ҳам медалларга сазовор бўла олди. Жумладан, бунгача Ўзбекистон ўсмирлар Олимпиадасида оғир атлетика бўйича хеч қачон олтин медаль қўлга киритмаганди. Шунингдек, ўзбекистонлик қизлар ҳам спорт курашлари бўйича медалларга эга чиқа олмаганди. Байдарка ва каноэда эшкак эшиш бўйича ҳам аввалги Олимпия ўйинларида медаллар қўлга киритилмаган. Бу сафар эшкак эшувчилар олтин ва кумуш медалларга эга чиқди.

Ўйинлар давомида ўзбекистонлик спортчилар 14 та медаль (микст баҳсларидаги иккита медаль ҳисобланмайди)қўлга киритди. Таққослаш учун, 2014 йилги ўсмирлар Олимпиадасида ўзбекистонлик спортчилар 10 та медалга эга чиққан ва якунда медаллар сифати бўйича 27-ўринни эгаллаганди. Бу сафарги ўйинларда Ўзбекистон терма жамоаси ўз позициясини янада яхшилади ва жаҳоннинг 206 мамлакати ичида 13-ўриндан жой олди. Бу орқали Ўзбекистон ўсмирлар Олимпия ўйинларидаги ўз рекордини янгилади.

Терма жамоа Осиёда бешинчи, МДҲда учинчи, Марказий Осиё давлатлари ичида биринчи бўла олди. Қўшни мамлакатлар ичида энг яқин таъқибчи Қозоғистон терма жамоаси 10 та медаль билан (4 та олтин, 3 та кумуш, 3 та бронза) 15-ўриндан жой олди. Қирғизистон эса 3 та медаль (2 та кумуш, 1 та бронза) билан 69-поғонадан ўрин олди. 1 та бронза медалини қўлга киритган Афғонистон вакиллари 90-ўринни эгаллашди. Яна икки қўшни давлат Тожикистон ва Туркманистон терма жамоаси вакиллари медаллар қўлга кирита олмади.