“O‘zbekistonni ko‘rish istagidamiz”

Bugun Parij ko‘chalarida fransiyaliklar bilan suhbatlashgan kishi tez-tez ana shunday fikr-mulohazalarni eshitishi mumkin, deya xabar beradi O‘zA.

Lionel Rapayl, Yevropa investitsiyalar banki departament boshlig‘i:

—Bugun Yevropa investitsiyalar banki uchun muhim kun. O‘zbekiston bilan hamkorlik o‘rnatib, ilk qo‘shma loyihamizni moliyalashtirdik. Bu loyiha mamlakatdagi qator shaharlar suv ta’minotida sanitariyani yaxshilashni ko‘zda tutadi. Biz, shuningdek, energiya samaradorligini oshirishga oid loyihalarni ham qo‘llab-quvvatlaymiz. Bugun Parijda bo‘lib o‘tgan O‘zbekiston – Fransiya biznes-forumi doirasida qiymati 10 million yevrodan ortiq shartnoma imzoladik. Ayni paytda transport, kichik biznes va xususiy tadbirkorlik kabi sohalardagi loyihalar ustida ham ish olib boryapmiz.

Simoni Laurens, shifokor:

— Keyingi paytlarda Parijda O‘zbekistonga bag‘ishlab ko‘plab tadbirlar o‘tkazilmoqda. Buni kuzatib shu narsaga amin bo‘ldimki, ikki mamlakat turli sohalar vakillarining uchrashuvlari mamlakatlarimiz hamkorligi uchun g‘oyat muhim. O‘zbekistonda, ayniqsa, Samarqandda bo‘lish, uning betakror obidalarini o‘z ko‘zim bilan ko‘rish mening orzuim. Aytgancha, u yerda vitaminlarga boy mevalar, poliz mahsulotlari yetishtirilishi haqida ko‘p eshitganman. O‘zim ovqat tayyorlashni yaxshi ko‘raman, unga ishlatiladigan mahsulotlar sifati doim meni qiziqtiradi. Agar O‘zbekistonning sifatli qishloq xo‘jaligi mahsulotlari olib kelinsa, albatta xarid qilgan bo‘lar edim.

Safiya Dupark, savdo xodimi:

— Bir necha yillardan beri farmatsevtika sohasida ishlayman. Parijda o‘zbeklarni ko‘p uchratish mumkin. O‘zbeklar xushmuomala va madaniyatli. Iyul oyida O‘zbekistonda bo‘ldim. Qadimiy shaharlar bilan tanishdim. Turizm yo‘nalishi bo‘yicha bir qancha ishlar amalga oshirilgan. Lekin qilinishi kerak bo‘lgan ishlar ham ko‘p. Sayyohlar oqimini ko‘paytirish uchun innovatsion yondashuv talab etiladi. Hozir shunday qilinyapti ekan. Bu mamlakatni yaqin yillarda sayyohlik sohasida yetakchi davlatlar qatoriga olib chiqishga xizmat qiladi, deb o‘ylayman.