Бугун Париж кўчаларида францияликлар билан суҳбатлашган киши тез-тез ана шундай фикр-мулоҳазаларни эшитиши мумкин, дея хабар беради ЎзА.
Лионель Рапайл, Европа инвестициялар банки департамент бошлиғи:
—Бугун Европа инвестициялар банки учун муҳим кун. Ўзбекистон билан ҳамкорлик ўрнатиб, илк қўшма лойиҳамизни молиялаштирдик. Бу лойиҳа мамлакатдаги қатор шаҳарлар сув таъминотида санитарияни яхшилашни кўзда тутади. Биз, шунингдек, энергия самарадорлигини оширишга оид лойиҳаларни ҳам қўллаб-қувватлаймиз. Бугун Парижда бўлиб ўтган Ўзбекистон – Франция бизнес-форуми доирасида қиймати 10 миллион евродан ортиқ шартнома имзоладик. Айни пайтда транспорт, кичик бизнес ва хусусий тадбиркорлик каби соҳалардаги лойиҳалар устида ҳам иш олиб боряпмиз.
Симони Лауренс, шифокор:
— Кейинги пайтларда Парижда Ўзбекистонга бағишлаб кўплаб тадбирлар ўтказилмоқда. Буни кузатиб шу нарсага амин бўлдимки, икки мамлакат турли соҳалар вакилларининг учрашувлари мамлакатларимиз ҳамкорлиги учун ғоят муҳим. Ўзбекистонда, айниқса, Самарқандда бўлиш, унинг бетакрор обидаларини ўз кўзим билан кўриш менинг орзуим. Айтганча, у ерда витаминларга бой мевалар, полиз маҳсулотлари етиштирилиши ҳақида кўп эшитганман. Ўзим овқат тайёрлашни яхши кўраман, унга ишлатиладиган маҳсулотлар сифати доим мени қизиқтиради. Агар Ўзбекистоннинг сифатли қишлоқ хўжалиги маҳсулотлари олиб келинса, албатта харид қилган бўлар эдим.
Сафия Дупарк, савдо ходими:
— Бир неча йиллардан бери фармацевтика соҳасида ишлайман. Парижда ўзбекларни кўп учратиш мумкин. Ўзбеклар хушмуомала ва маданиятли. Июль ойида Ўзбекистонда бўлдим. Қадимий шаҳарлар билан танишдим. Туризм йўналиши бўйича бир қанча ишлар амалга оширилган. Лекин қилиниши керак бўлган ишлар ҳам кўп. Сайёҳлар оқимини кўпайтириш учун инновацион ёндашув талаб этилади. Ҳозир шундай қилиняпти экан. Бу мамлакатни яқин йилларда сайёҳлик соҳасида етакчи давлатлар қаторига олиб чиқишга хизмат қилади, деб ўйлайман.
Изоҳ (0)