O‘zbekiston Respublikasi Markaziy saylov komissiyasining navbatdagi majlisi bo‘lib o‘tdi. Bu haqda O‘zA xabar berdi.
Majlisda Markaziy saylov komissiyasi tomonidan Surxondaryo, Navoiy, Sirdaryo, Namangan viloyatlari hamda Toshkent shahrida bo‘lib o‘tgan davlat hokimiyati vakillik organlari deputatlarining qo‘shma majlisida bo‘shab qolgan o‘rinlarga saylangan Oliy Majlis Senatining yangi a’zolariga Senat a’zosi guvohnomasi va ko‘krak nishoni tantanali ravishda topshirildi.
Shuningdek, yig‘ilishda Prezidentning 2017-yil 22-dekabrdagi Oliy Majlisga Murojaatnomasida belgilab berilgan vazifalar ijrosini ta’minlash maqsadida ishlab chiqilgan O‘zbekiston Respublikasining Saylov kodeksi loyihasining keng jamoatchilik o‘rtasidagi muhokamasi natijalari tahliliga bag‘ishlangan masala ko‘rib chiqildi.
Ma’lumki, Markaziy saylov komissiyasi, Oliy Majlis palatalari, Adliya vazirligi, siyosiy partiyalar va boshqa jamoat tashkilotlari vakillari, olimlar va ekspertlardan iborat ishchi guruh Saylov kodeksi loyihasini ishlab chiqdi. Saylov kodeksi loyihasi O‘zbekiston Respublikasi normativ-huquqiy hujjatlar loyihalari muhokamasi portalida jamoatchilik muhokamasiga qo‘yildi hamda Markaziy saylov komissiyasining rasmiy veb-saytida o‘zbek va rus tillarida joylashtirildi.
Saylov kodeksi loyihasining muhokamasiga bag‘ishlab hududlarda jami 278 ta tadbir o‘tkazilgan bo‘lib, unda aholi tomonidan 436 ta taklif bildirilgan.
2018-yilning 6—7-sentabr kunlari Saylov kodeksi loyihasi bo‘yicha tegishli davlat organlari hamda fuqarolik jamiyati institutlari vakillari bilan fikr almashish maqsadida Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi va Venetsiya komissiyasi delegatsiyasining O‘zbekiston Respublikasiga tashrifi bo‘lib o‘tdi. Delegatsiya tomonidan O‘zbekistonda Saylov kodeksi loyihasini tayyorlash va keyingi saylovlarda saylovchilarning elektron ro‘yxati amal qilishi joriy etilayotgani ijobiy baholandi.
Izoh (0)