Chirchiqda harbiylar va yoshlar o‘rtasida sportning bir nechta yo‘nalishi bo‘yicha bellashuvlar o‘tkazildi (foto)
Chirchiq shahridagi harbiy qismlarning birida Bo‘stonliq tumani hokimligi bilan hamkorlikda “Ajdodlarga munosib avlod bo‘laylik” shiori ostida kurash, futbol va yugurish bo‘yicha sport musobaqalari tashkil etildi. Bu haqda Mudofaa vazirligi matbuot xizmati “Daryo”ga ma’lum qildi.
Musobaqada Bo‘stonliq tumani yoshlari va harbiy qism xizmatchilari o‘zaro kuch sinashdi.
Musobaqani Bo‘stonliq tuman hokimiyati vakillari, Bolalar o‘smirlar sport maktabi a’zolari, O‘zbekiston Yoshlar ittifoqi vakillari bevosita kuzatib, baholab bordi.
Kurash bo‘yicha umumjamoa miqyosida 1- va 3-o‘rinlarga mezbon harbiy xizmatchilar egalik qilgan bo‘lsa, 2-o‘rinni Bo‘stonliq yoshlari egalladi. Futbol bo‘yicha Bo‘stonliq yoshlari birinchilikni egallagan bo‘lsa, yugurish bo‘yicha harbiy xizmatchilar g‘oliblikni qo‘lga kiritdi. G‘olib va sovrindorlar tashkilotchilar tomonidan munosib rag‘batlantirildi.
