Binali Yildirim Samarqanddagi muqaddas qadamjolarni ziyorat qildi

Rasmiy tashrif bilan O‘zbekistonga kelgan Turkiya bosh vaziri Binali Yildirim 25-sentabr kuni Samarqand shahrida bo‘ldi. Bu haqda O‘zA xabar berdi.

Yuqori martabali mehmon Oliy Majlis Qonunchilik palatasi spikeri Nuriddin Ismoilov hamrohligida O‘zbekistonning birinchi Prezidenti Islom Karimov maqbara-majmuasini ziyorat qildi.

Turkiya delegatsiyasi majmuada amalga oshirilgan bunyodkorlik ishlari va bu yerdagi eng qadimiy obidalardan biri — Hazrati Xizr masjidini asrab-avaylash borasidagi ishlarga yuksak baho berdi.

Shundan so‘ng, Binali Yildirim Imom Buxoriy va Abu Mansur Moturidiy yodgorlik majmularini ziyorat qildi. Ushbu maskanlar bilan tanishuv chog‘ida muqaddas islom dini rivojiga beqiyos hissa qo‘shgan buyuk allomalarning boy ma’naviy merosini o‘rganish, ular nomi bilan bog‘liq qadamjolarni obod etish yuzasidan mamlakatda olib borilayotgan ishlar haqida batafsil ma’lumot berildi.

Turkiyalik yuqori martabali mehmon Samarqand shahridagi Amir Temur maqbarasi, Registon maydoni va boshqa tarixiy obidalarni ham tomosha qildi.