Ijtimoiy tarmoqlar, internet rivojlangan bir paytda bosma nashrlar qanday yashab qoladi? Shu paytgacha obuna hisobidan kun ko‘rib kelgan gazeta-jurnallar yopiladimi? “Matbuot tarqatuvchi” va pochta obuna pulini tahririyatlarga o‘tkazib berishni nega paysalga solmoqda? Farg‘onada o‘tkazilgan “Axborot maydonida bosma nashrlar, elektron OAV va ijtimoiy tarmoqlar mutanosibligi” mavzusidagi ilmiy-amaliy konferensiyada shu kabi muammolar yuzasidan fikr almashildi, deya xabar beradi “Daryo” muxbiri Azizjon Ermatov.
—Axborot texnologiyalari taraqqiy etgan Yaponiya, Janubiy Koreyada adadi juda katta bo‘lgan nashrlar bor. Bizning nashrlarimiz ham zamon talablariga moslashishi zarur. Mavzu tanlashga yangicha yondashishimiz, yozish uslubimizni o‘zgartirishimiz kerak. Ayniqsa, bosma nashrlarda chuqur tahlilga asoslangan maqolalar salmog‘ini ko‘paytirish kun tartibidagi muhim masala, – deydi “O‘zbekiston ovozi” gazetasi bosh muharriri Safar Ostonov.
Konferensiyada jurnalistlar malakasini oshirish, tanqidiy va tahliliy maqolalar tayyorlash, mavzu tanlash, dizayn va sahifalash, internet hamda ijtimoiy tarmoqlar rivoji xususida so‘z yuritildi.
— Yaqinda Janubiy koreyalik taniqli aktrisa, o‘zbekistonliklarga “Saroy javohiri” serialidagi Tangem roli bilan tanilgan Li Yong E bilan “Olam aro” jurnali uchun intervyu uyushtirmoqchi bo‘ldik. Shu vaziyatda nima qilish kerak edi? Koreyaga muxbir jo‘natish anchagina mablag‘, mehnat va vaqt talab qiladi. Biz boshqacha yo‘l tutdik – elchixona orqali aktrisaning elektron manzilini olib, unga koreys tilida xat yubordik. Tez orada Li Yong Edan javob keldi va biz undan onlayn tarzda intervyu oldik. Ish jarayonida har kuni duch kelishimiz mumkin bo‘lgan bu kabi vaziyatlar bugun axborot maydonida yashab qolishni istagan har qanday OAV zamonaviy texnologiyalardan samarali foydalanishi kerakligini bildiradi, – deydi Jurnalistlar ijodiy uyushmasi Farg‘ona viloyati bo‘limi raisi Muhammadjon Obidov.
Hududiy nashrlarni qiynayotgan muammolardan yana biri — oliy ma’lumotli va malakali jurnalistlarning yetishmasligi. Bugungi kunda tahririyatlarda mehnat qilayotganlarning asosiy qismi pensiya yoshidagi yoki boshqa soha mutaxassislaridir. Yosh, yangicha fikrlaydigan va an’anaviy qoliplardan holi maqolalar yozadigan kadrlarga ehtiyoj yuqori.
— Agar gazetalar yashab qolmasa, ayb o‘zimizda bo‘ladi. O‘zimizni aravamizni o‘zimiz tortishimiz kerak. Albatta, gazetalarda chuqur tahlillarga asoslangan materiallar salmog‘ini ko‘paytirish, kadrlar salohiyatini oshirish lozim. Afsuski, oramizda “yozaman” degan jurnalistlar juda kam, – deydi “Ishonch” gazetasi bosh muharriri Husan Ermatov.
Bosma nashrlar faoliyatini yaxshilash uchun pochta xizmati va matbuot tarqatish tizimini jiddiy isloh qilish kerak. Bu sohada xizmat ko‘rsatish sifati past va narxi juda yuqori.
— Matbuot nashrlarini tarqatuvchi tashkilotlar faoliyati talabga javob bermaydi. Gazetamiz ba’zida bir oyda ham obunachiga yetib bormayapti. Gazetani vaqtida olmagan o‘quvchi yana qaytib shu nashrga obuna bo‘ladimi? Yo‘q, albatta. Bundan tashqari, tarqatuvchi tashkilotlar obuna pullarini o‘z vaqtida tahririyat hisob raqamiga o‘tkazib bermaydi, – deydi “Ferganskaya pravda” gazetasi bosh muharriri Gulbahor Saidg‘aniyeva.
— “Hurriyat” gazetasida bosh muharrir sifatida ish boshlagan kunlarim O‘zA muxbiri savol berdi: “Siz gazetada, axborot agentligida ishlagansiz. Nima deb o‘ylaysiz, endi matbuot o‘ladimi?” Men unga shunday javob qaytardim: “Shoshilmanglar, matbuot hali uzoq yashaydi! Chunki axborot maydonida matbuotning o‘z o‘rni bor. Yangicha sharoitlarga moslashish, o‘quvchiga kerakli va qiziqarli mavzularni professional tarzda yoritishi kerak, – deydi “Hurriyat” gazetasi bosh muharriri Qulmon Ochil.
Jurnalistika va ommaviy kommunikatsiyalar universiteti hamda Jurnalistlar ijodiy uyushmasi Farg‘ona viloyat bo‘limi tomonidan tashkil etilgan tadbirda O‘zbekistondagi yetakchi ommaviy axborot vositalari rahbarlari, Andijon, Namangan va Farg‘ona viloyatlarida faoliyat yuritayotgan bosma va elektron OAV vakillari ishtirok etdi.
Konferensiya ishtirokchilari Marg‘ilon shahridagi Erkin Vohidov nomidagi ijodkorlar bog‘ida bo‘ldi. Shoirning memorial muzeyida Erkin Vohidov hayoti va ijodi haqida hikoya qiluvchi muhim manbalar bilan tanishdi. Quvasoy shahridagi “Vodiy tulporlari” naslchilik majmuasida amalga oshirilayotgan ishlar ham tadbir ishtirokchilarida katta taassurot qoldirdi.
Izoh (0)