Ижтимоий тармоқлар, интернет ривожланган бир пайтда босма нашрлар қандай яшаб қолади? Шу пайтгача обуна ҳисобидан кун кўриб келган газета-журналлар ёпиладими? «Матбуот тарқатувчи» ва почта обуна пулини таҳририятларга ўтказиб беришни нега пайсалга солмоқда? Фарғонада ўтказилган «Ахборот майдонида босма нашрлар, электрон ОАВ ва ижтимоий тармоқлар мутаносиблиги» мавзусидаги илмий-амалий конференцияда шу каби муаммолар юзасидан фикр алмашилди, дея хабар беради «Дарё» мухбири Азизжон Эрматов.
—Ахборот технологиялари тараққий этган Япония, Жанубий Кореяда адади жуда катта бўлган нашрлар бор. Бизнинг нашрларимиз ҳам замон талабларига мослашиши зарур. Мавзу танлашга янгича ёндашишимиз, ёзиш услубимизни ўзгартиришимиз керак. Айниқса, босма нашрларда чуқур таҳлилга асосланган мақолалар салмоғини кўпайтириш кун тартибидаги муҳим масала, – дейди «Ўзбекистон овози» газетаси бош муҳаррири Сафар Остонов.
Конференцияда журналистлар малакасини ошириш, танқидий ва таҳлилий мақолалар тайёрлаш, мавзу танлаш, дизайн ва саҳифалаш, интернет ҳамда ижтимоий тармоқлар ривожи хусусида сўз юритилди.
— Яқинда Жанубий кореялик таниқли актриса, ўзбекистонликларга «Сарой жавоҳири» сериалидаги Тангем роли билан танилган Ли Ёнг Э билан «Олам аро» журнали учун интервью уюштирмоқчи бўлдик. Шу вазиятда нима қилиш керак эди? Кореяга мухбир жўнатиш анчагина маблағ, меҳнат ва вақт талаб қилади. Биз бошқача йўл тутдик – элчихона орқали актрисанинг электрон манзилини олиб, унга корейс тилида хат юбордик. Тез орада Ли Ёнг Эдан жавоб келди ва биз ундан онлайн тарзда интервью олдик. Иш жараёнида ҳар куни дуч келишимиз мумкин бўлган бу каби вазиятлар бугун ахборот майдонида яшаб қолишни истаган ҳар қандай ОАВ замонавий технологиялардан самарали фойдаланиши кераклигини билдиради, – дейди Журналистлар ижодий уюшмаси Фарғона вилоят бўлими раиси Муҳаммаджон Обидов.
Ҳудудий нашрларни қийнаётган муаммолардан яна бири — олий маълумотли ва малакали журналистларнинг етишмаслиги. Бугунги кунда таҳририятларда меҳнат қилаётганларнинг асосий қисми пенсия ёшидаги ёки бошқа соҳа мутахассисларидир. Ёш, янгича фикрлайдиган ва анъанавий қолиплардан ҳоли мақолалар ёзадиган кадрларга эҳтиёж юқори.
— Агар газеталар яшаб қолмаса, айб ўзимизда бўлади. Ўзимизни аравамизни ўзимиз тортишимиз керак. Албатта, газеталарда чуқур таҳлилларга асосланган материаллар салмоғини кўпайтириш, кадрлар салоҳиятини ошириш лозим. Афсуски, орамизда «ёзаман» деган журналистлар жуда кам, – дейди «Ишонч» газетаси бош муҳаррири Ҳусан Эрматов.
Босма нашрлар фаолиятини яхшилаш учун почта хизмати ва матбуот тарқатиш тизимини жиддий ислоҳ қилиш керак. Бу соҳада хизмат кўрсатиш сифати паст ва нархи жуда юқори.
— Матбуот нашрларини тарқатувчи ташкилотлар фаолияти талабга жавоб бермайди. Газетамиз баъзида бир ойда ҳам обуначига етиб бормаяпти. Газетани вақтида олмаган ўқувчи яна қайтиб шу нашрга обуна бўладими? Йўқ, албатта. Бундан ташқари, тарқатувчи ташкилотлар обуна пулларини ўз вақтида таҳририят ҳисоб рақамига ўтказиб бермайди, – дейди «Ферганская правда» газетаси бош муҳаррири Гулбаҳор Саидғаниева.
— «Ҳуррият» газетасида бош муҳаррир сифатида иш бошлаган кунларим ЎзА мухбири савол берди: «Сиз газетада, ахборот агентлигида ишлагансиз. Нима деб ўйлайсиз, энди матбуот ўладими?» Мен унга шундай жавоб қайтардим: «Шошилманглар, матбуот ҳали узоқ яшайди! Чунки ахборот майдонида матбуотнинг ўз ўрни бор. Янгича шароитларга мослашиш, ўқувчига керакли ва қизиқарли мавзуларни профессионал тарзда ёритиши керак, – дейди «Ҳуррият» газетаси бош муҳаррири Қулмон Очил.
Журналистика ва оммавий коммуникациялар университети ҳамда Журналистлар ижодий уюшмаси Фарғона вилоят бўлими томонидан ташкил этилган тадбирда Ўзбекистондаги етакчи оммавий ахборот воситалари раҳбарлари, Андижон, Наманган ва Фарғона вилоятларида фаолият юритаётган босма ва электрон ОАВ вакиллари иштирок этди.
Конференция иштирокчилари Марғилон шаҳридаги Эркин Воҳидов номидаги ижодкорлар боғида бўлди. Шоирнинг мемориал музейида Эркин Воҳидов ҳаёти ва ижоди ҳақида ҳикоя қилувчи муҳим манбалар билан танишди. Қувасой шаҳридаги «Водий тулпорлари» наслчилик мажмуасида амалга оширилаётган ишлар ҳам тадбир иштирокчиларида катта таассурот қолдирди.
Изоҳ (0)