Un eksporti bo‘yicha Qozog‘iston tarmog‘i agrar-sanoat kompleksidagi boshqa barcha tarmoqlardan farq qiladi. Bu haqda Qozog‘iston donni qayta ishlovchilar ittifoqi raisi Yevgeniy Gan aytib o‘tdi, deb yozadi Spot.
“Tarixiy sharoit tufayli, biz tarmoqni rivojlantirish darajamiz bo‘yicha barchani 10—15 yilga ortda qoldirdik. Mahsulotimizga katta talab hamda qulay sharoitlar bor edi”, —dedi Gan.
Uning so‘zlariga ko‘ra, un sotilishi barqaror bo‘lib, u mintaqada quyidagi tartibda taqsimlanadi: O‘zbekiston, Tojikiston, Qirg‘iziston, Turkmaniston va Afg‘oniston.
“Ammo 2011-yilda O‘zbekiston import unga aksiz solig‘ini 10 foiz qilib belgiladi… Keyinroq bu raqam 15 foizgacha ko‘tarildi… O‘tgan yil sentabrda davlat rahbarimiz O‘zbekistonning yangi prezidenti bilan uchrashganida aksizlar bekor qilindi. Biroq shu vaqt ichida O‘zbekiston juda yaxshi, baquvvat tegirmon sanoati tarmog‘ini yaratishga ulgurdi, uning qayta ishlash hajmi yiliga kamida 1,5 million tonna bo‘lsa kerak”, — dedi Gan.
Uning so‘zlariga ko‘ra, besh-yetti yil avval yirik importchi O‘zbekiston bo‘lgan, uning ulushi umumiy hajmning 65—66 foizini tashkil qilgan, ammo bugun birinchi o‘rinda Afg‘oniston turadi.
“Hozir o‘zbekistonlik sheriklarimiz bilan muzokaralar olib boryapmiz, ya’ni ichki va tashqi tashuvlar uchun tariflarni uyg‘unlashtiryapmiz. Kechagina muhim hujjatni qo‘lga kiritdik. Biz O‘zbekiston temir yo‘llarining har bir vagon uchun 280 dollarlik qo‘shimcha yig‘imni bekor qilishiga erishdik. Muayyan qadamlar bor. O‘zbek biznesi uxlamayotgani va o‘z manfaatlari yo‘lida o‘z vazifalarini qo‘yayotgani tushunarli holat”, — dedi Gan.
Izoh (0)