24-sentabr kuni O‘zbekiston Respublikasi Bosh prokuraturasi rahbariyatining Xalqaro prokurorlar assotsiatsiyasining (XPA) prezidenti Gerxard Yarosh boshchiligidagi delegatsiyasi bilan uchrashuvi bo‘lib o‘tdi. Bu haqda Bosh prokuratura matbuot xizmati xabar bermoqda.
Xalqaro hamkorlarga respublikada sud-huquq tizimida amalga oshirilayotgan keng ko‘lamli islohotlar, shu jumladan, prokuratura organlari tizimining tubdan qayta tashkil etilganligi haqida ma’lumot berilib, prokuratura organlari faoliyatining yangi ustuvor yo‘nalishlari alohida ta’kidlab o‘tildi.
O‘zbekistonda amalga oshirilgan yangilanish va modernizatsiya jarayoniga yuksak baho berar ekan, Gerxard Yarosh O‘zbekiston Respublikasi Bosh prokuraturasi bilan hamkorlik o‘rnatishga katta ishonch bildirdi. Uchrashuv davomida XPA Prezidenti ishtirokchilarni XPAning faoliyati, uning asosiy yo‘nalishlari va vazifalari bilan tanishtirdi.
Xususan, qayd etilganidek, assotsiatsiya atigi 23 yil avval tashkil topganiga qaramasdan, hozirgi kunda XPAga 180 ta davlat a’zo bo‘lib, u dunyoning ko‘p mamlakatlari prokuratura organlari orasida professional aloqalarni o‘rnatish uchun muhim platforma hisoblanadi. Shuningdek, janob Gerxard Yarosh O‘zbekiston prokurorlarini 2019-yilda Minsk (Belarus) shahrida o‘tkazilishi rejalashtirilgan mintaqaviy konferensiyaga taklif qildi.
Uchrashuv yakunlari bo‘yicha O‘zbekiston XPAga a’zo bo‘lishi uchun tomonlar amalga oshirilishi lozim bo‘lgan davlat ichki protseduralarini yo‘lga qo‘yish hamda boshqa a’zo davlatlar prokuraturalari bilan O‘zbekiston uchun manfaatli bo‘lgan aloqalarni o‘rnatishda XPA tomonidan yordam berilishiga og‘zaki kelishib oldilar.
Bosh prokuraturadagi uchrashuv davomida XPA delegatsiyasi vakillari prokuratura xodimlari uchun XPA faoliyatining asosiy maqsadlari haqida prezentatsiya qildi. Shu jumladan, kasbiy manfaatlarni rivojlantirish yo‘lida prokurorlarni birlashtirish va jinoyat-huquqiy faoliyat maqsadlariga erishishda ularning roli asosiy ekanligini targ‘ib qilish, dalillarni to‘plash va taqdim qilish bo‘yicha xalqaro hamkorlikning tezkorligi va samaradorligini oshirish, jinoiy javobgarlikdan, hibsga olinishdan, musodaradan yashirinib yurgan jinoyatchilarni ta’qib qilish, davlat boshqaruvida korrupsiyani bartaraf etishga ko‘maklashish, axborot va tadqiqotlar almashinuvi, shuningdek sud-huquq tizimini isloh qilish jarayonida ishtirok etayotgan prokurorlarga yordam berish to‘g‘risida batafsil ma’lumotlar berildi.
Izoh (0)