24 сентябрь куни Ўзбекистон Республикаси Бош прокуратураси раҳбариятининг Халқаро прокурорлар ассоциациясининг (ХPA) президенти Герхард Ярош бошчилигидаги делегацияси билан учрашуви бўлиб ўтди. Бу ҳақда Бош прокуратура матбуот хизмати хабар бермоқда.
Халқаро ҳамкорларга республикада суд-ҳуқуқ тизимида амалга оширилаётган кенг кўламли ислоҳотлар, шу жумладан, прокуратура органлари тизимининг тубдан қайта ташкил этилганлиги ҳақида маълумот берилиб, прокуратура органлари фаолиятининг янги устувор йўналишлари алоҳида таъкидлаб ўтилди.
Ўзбекистонда амалга оширилган янгиланиш ва модернизация жараёнига юксак баҳо берар экан, Герхард Ярош Ўзбекистон Республикаси Бош прокуратураси билан ҳамкорлик ўрнатишга катта ишонч билдирди. Учрашув давомида ХPA Президенти иштирокчиларни ХPAнинг фаолияти, унинг асосий йўналишлари ва вазифалари билан таништирди.
Хусусан, қайд этилганидек, ассоциация атиги 23 йил аввал ташкил топганига қарамасдан, ҳозирги кунда ХPAга 180 та давлат аъзо бўлиб, у дунёнинг кўп мамлакатлари прокуратура органлари орасида профессионал алоқаларни ўрнатиш учун муҳим платформа ҳисобланади. Шунингдек, жаноб Герхард Ярош Ўзбекистон прокурорларини 2019 йилда Минск (Беларусь) шаҳрида ўтказилиши режалаштирилган минтақавий конференцияга таклиф қилди.
Учрашув якунлари бўйича Ўзбекистон ХPAга аъзо бўлиши учун томонлар амалга оширилиши лозим бўлган давлат ички процедураларини йўлга қўйиш ҳамда бошқа аъзо давлатлар прокуратуралари билан Ўзбекистон учун манфаатли бўлган алоқаларни ўрнатишда ХPA томонидан ёрдам берилишига оғзаки келишиб олдилар.
Бош прокуратурадаги учрашув давомида ХPA делегацияси вакиллари прокуратура ходимлари учун ХPA фаолиятининг асосий мақсадлари ҳақида презентация қилди. Шу жумладан, касбий манфаатларни ривожлантириш йўлида прокурорларни бирлаштириш ва жиноят-ҳуқуқий фаолият мақсадларига эришишда уларнинг роли асосий эканлигини тарғиб қилиш, далилларни тўплаш ва тақдим қилиш бўйича халқаро ҳамкорликнинг тезкорлиги ва самарадорлигини ошириш, жиноий жавобгарликдан, ҳибсга олинишдан, мусодарадан яшириниб юрган жиноятчиларни таъқиб қилиш, давлат бошқарувида коррупцияни бартараф этишга кўмаклашиш, ахборот ва тадқиқотлар алмашинуви, шунингдек суд-ҳуқуқ тизимини ислоҳ қилиш жараёнида иштирок этаётган прокурорларга ёрдам бериш тўғрисида батафсил маълумотлар берилди.
Изоҳ (0)