17-sentabr kuni Milliy matbuot markazida Oliy Majlis Senatining mahalliy hokimiyat vakillik organlari faoliyatini kuchaytirishga ko‘maklashuvchi komissiyasining brifingi o‘tkazildi. Bu haqda Spot xabar bermoqda.
Xabarga ko‘ra, anjumanda Komissiya raisi Tolibjon Madumarov jurnalistlarga joriy yilning avgust-sentabr oylarida Oliy Majlis Senati Kengashi hamda Toshkent shahrining barcha tumanlari mahalliy Kengashlarining qo‘shma majlislarida muhokama qilingan masalalar va qabul qilingan qarorlar yuzasidan axborot berdi.
Bugungi kunda Toshkent shahrida doimiy aholi soni 2,5 milliondan ziyod, ulardan 1,5 million kishi mehnatga layoqatli, 1,1 million nafar ish bilan band aholi, qariyb 99 ming ishsizlar, 90 mingdan ortiq kishi mehnat migrantlaridir. Shuningdek, deyarli 39 ming kishi joriy yilda mehnat bozoriga birinchi marta kirib kelgan yoshlardir.
“Toshkent shahri bo‘yicha faqatgina 91 ming kishi Jamoat ishlari jamg‘armasi hisobidan bir martalik va vaqtinchalik ishlarga jalb qilingan, bu borada mavjud imkoniyatlardan to‘liq foydalanilmayapti. Joriy yilning birinchi yarmi yakunlariga ko‘ra, norasmiy band aholi soni 141 ming nafardan ziyodni tashkil etgan”,— deyiladi xabarda.
Poytaxtning ko‘p qavatli uylarini kuz-qish mavsumiga tayyorlash dasturi doirasida bajarilishi lozim bo‘lgan ishlarni moliyalashtirish uchun qariyb 158 milliard so‘m (103%) kredit mablag‘lari ajratilgan. Biroq, belgilangan vazifalarning yarmidan ko‘pi (51%) o‘z vaqtida ijro etilmagan.
Ta’kidlanishicha, ayniqsa, Yashnobod, Chilonzor, Sergeli, Bektemir va Shayxontohur tumanlarida mazkur yo‘nalishdagi ishlar paysalga solinayotganligi qayd etildi. Bundan tashqari, Toshkent shahridagi mavjud 1440 ta xususiy uy-joy mulkdorlari shirkatidan 304 tasi moliyaviy ahvoli qoniqarsizligi sababli imtiyozli kreditlar ololmagan. Ularning aksariyati Mirobod, Shayxontohur, Chilonzor, Sergeli va Yunusobod tumanlarida joylashgan.
Xususiylashtirilgan korxonalarga ko‘maklashish va raqobatni rivojlantirish davlat qo‘mitasining axborotiga ko‘ra, Toshkent shahridagi jami 505 ta mahallada 3 mingdan ziyod foydalanilmasdan bo‘sh turgan ob’yekt aniqlangan. Jumladan, mazkur obyektlarning 335 tasi davlat tasarrufidagi obyekt bo‘lsa, 800 dan ortig‘i ilgari xususiylashtirilgan, 1300 ga yaqini mulkdorlarning o‘zlari tomonidan qurilgan hamda qariyb 550 tasi egasiz bino-inshootlardir.
Izoh (0)